سه‌ما
راوێژکارێ ئاسایشا نیشتمانی یا عیراقێ دیار دکەت، چ نیازێن مە نینن کو ئەم بکەڤینە د شەری دا، لێ ب توندی دێ بەرسڤا هەر هێرش و پێشێلکرنەکا سەروەریا ئاخا عیراقێ دەینەڤە.
قاسم ئەعرەجی راوێژکارێ ئاسایشا نیشتمانی یا عیراقێ دبێژیت ژی، مافێ مەیە کو ئەم بەرگریێ ل خوە بکەین، فەرماندەیێ گشتی یێ هێزێن چەکدار گەلەک ب جددی کار بۆ هندێ دکەت، کو ئالۆزی و گرژی کێم بکەت و چ نیازێن مە نینن کو ئەم بکەڤینە د شەرەکی دا کو دبیت ئەنجامێن ترسناک هەبن.
ئاماژه ب وێ چه‌ندێ دا، بریاردان د شەر و ئاشتیێ دا تنێ د دەستهەلاتا حکومەتا عیراقێ دایە و بۆ چ لایەنەکێ دی نینە کو ڤێ چەندێ بکەت. دبێژیت ژی، ب توندی دێ بەرسڤا هەر هێرش و پێشێلکرنەکا سەروەریا ئاخا عیراقێ دەینەڤە.
ئەڤە ژی د دەمەکی دایە کو کۆمێن چەکدار یێن سەر ب ئیرانێ ڤە ژ عیراقێ ب رۆکێتان و درۆنان هێرشێ دکەنە سەر ئیسرائیلێ و د هێرشەکا درۆنی یا رۆژا ئەینیێ، چاری ئۆکتۆبەرێ، دوو سەربازێن ئیسرائیلی هاتنە کوشتن و بیست و سێیێن دی ژی بریندار بوون.
ل لایێ خوەڤە محەمەد شیاع سوودانی سەرۆکوەزیرێ عیراقێ داخواز ژ وەلاتێن جیهانێ، ب تایبەت ئەمریکا و ئەورۆپا، دکەت کو بۆ رێگرتن ژ فرەهبوونا شەری، فرۆتن و دانا چەکان بۆ ئیسرائیلێ راوەستینن.