سه‌ما
رێکخراوا لێبۆرینا نێڤدەولەتی رەخنە ل سەرۆک وەزیرێ پۆلەندا دۆنالد توسک گرت ل سەر نیازا وی یا راوەستاندنا مافێ پەنابەریێ ل وەلاتێ خوە و قەدەغەکرنا وەرگرتنا کۆچبەران.
د داخویانەکا کو ژ ئالیێ لقێ رێکخراوێ ل پۆلەندا ڤە هاتیە دەرکرن هاتیە: “ئەم دخوازین بیرا سەرۆک وەزیر دۆنالد توسک بینین کو مافێ پەنابەریێ مافەکە ژ مافێن مرۆڤی یە. راوەستاندنا نە ژیرانە یا ڤی مافی – هەتا ئەگەر بۆ دەمەکێ کورت بیت ژی – کارەکێ نە پەژراندی یە و دژی پەیماننامەیا جنێڤ و راگەهاندنا جیهانی یا مافێن مرۆڤی یە.”
هەروەسا د دەیاخویانێ دا هاتیە کو “هەر کەسەکێ ژ چەوساندنێ بڕەڤیت و ل بەر مەترسیا زیانەکا گران ل وەلاتێ خوە بیت، مافێ وی هەیە داخوازا پاراستنا نێڤدەولەتی بکەت کو ب مافێ پەنابەریێ تێتە نیاسین.”
د ناڤەراستا سالا 2021 دا، چەند هزار کۆچبەر ل سەر سنورێ ناڤبەرا پۆلەندا و بیلاروسیا کۆم بوین و هەول دان بکەڤنە ناڤ ئاخا یەکێتیا ئەوروپا. ژ وی دەمی ڤە، چەند سەد کۆچبەرێن نە یاسایی هەر مەهێ هەول ددەن بزدی بکەڤنە ناڤ ئاخا پۆلەندا.
دەستهەلاتێن پۆلەندا رێکارێن ئەمنی ل سەر سنورێن خوە زێدە کرن و دەڤەرەکا ئارام چێکرن و پەرژینەک ب درێژاهیا 186 کیلۆمەتران و بلنداهیا 5 مەتران چێکر، و مینسک تۆمەتبار دکەن کو کریزا کۆچبەریێ دروست کریە. ژ الیێ خوە ڤە، بیلاروسیا ڤان هەمی تۆمەتان رەد دکەت و دبێژیت کو پۆلەندا کۆچبەران ب هێزێ دەردێخیت.
ژێدەر: نۆڤۆستی.