سه‌ما
سەرۆک وەزیرێ ئیسرائیلێ، بنیامین نەتانیاهو، رۆژا یەکشەمبێ، داخواز ژ سکرتێرێ گشتی یێ نەتەوێن یەکگرتی، ئەنتۆنیۆ گوتێرێس، کر کو هێزێن یونیفێل ژ دەڤەرێن شەڕی ل لوبنانێ ڤەگوهێزیت.
نەتانیاهو داخواز ژ گوتێرێس کر کو هێزێن دەمکی یێن نەتەوێن یەکگرتی ل لوبنانێ “ژ مەترسیێ دویر بکەت ل زویترین دەم”.
نەتانیاهو د داخویانيەکا ڤیدیۆیی دا گۆت، بەرەف گوتێرێس: “هێزێن یونیفێل ژ مەترسیێ دویر بکەن. دڤێت ئەڤ یەک نوکە و ل زویترین دەم بێتە کرن”، ل گۆر ئاژانسا فرانس پرێس.
نەتانیاهو گۆت کو لەشکەرێ ئیسرائیلێ گەلەک جاران داخواز ژ نەتەوێن یەکگرتی کریە کو لەشکەران ژ وێ دەڤەرێ دەربێخن، و زێدەکر کو مانا وان ل وێ دەڤەرێ وان دکەتە “بارمتە ل جەم حزب الله” وەک ئەو دبێژیت.
هەروەسا، ل کێمترین 5 کەس ژ ئەندامێن یونیفێل د رۆژێن دویماهیێ دا برینداربوینە د ناڤ شەڕێن د ناڤبەرا هێزێن ئیسرائیلێ و حزب الله دا ل باشویرێ لوبنانێ.
دەربارەی کەرتێ غەززە، نەتانیاهو گۆت کو هێزێن ئیسرائیلێ بەردەوامن د ئۆپەراسیۆنێن خوە دا ل جەبالیا ل باکورێ کەرتێ غەززە، ل وێرێ لەشکەر “قەلایێن” حەماس ژ هەڤ بەلاڤ دکەن.
ژ ئالیێ خوە ڤە، پاپا فرانسیس، رۆژا یەکشەمبێ، داخواز کر کو “رێز” ل هێزێن دەمکی یێن نەتەوێن یەکگرتی ل لوبنانێ بێتە گرتن، پشتی هندەک ژ ئەندامێن وان د شەڕێن باشویرێ لوبنانێ دا هاتنە برینداکرن.
پاپا گۆت: “ئەز نێزیکی هەمی خەلکێن تێکەل د ڤێ پرسێ دا مە، فەلەستین، ئیسرائیل، لوبنان، و داخواز دکەم کو رێز ل هێزێن ئاشتیێ یێن نەتەوێن یەکگرتی بێتە گرتن”.
هێزێن یونیفێل، کو 10 هزار لەشکەرێن نەتەوێن یەکگرتی د ناڤ خوە دا دگریت، رۆژا شەمبیێ هشیاری دا دەربارەی مەترسیداریا رەوشێ.
34 وەلاتێن بەشدار د یونیفێل دا د دەیاخویانەکا هەڤپشک دا داخواز کرن کو پێدڤیە پاراستنا هێزێن ئاشتیێ بێتە دابینکرن، و تەئکید کر کو پێدڤیە ئەمنیەتا ئەندامێن هێزێن ئاشتیێ بێتە گەرەنتیکرن.
هەروەسا، 34 وەلاتان ئەو ئێریشێن کو ل دژی هێزێن نەتەوێن یەکگرتی د دوو رۆژێن بوری دا ل لوبنانێ هاتینە کرن شەرمەزار کرن.
ژ 23ێ ئەیلولێ، ئیسرائیلێ زێدەتر بۆمبەباران کریە ل سەر وان تشتێن کو دبێژیت بنگەهێن ژێرزەمینی و ناڤەندێن حزب الله نە.