سه‌ما
ئەو مرۆڤێن ژ مرنێ نێزیک دبن گەلەک جاران بەحسێ وێ چەندێ دکەن د وی دەمیدا هەموو بیرەوەریێن ژیانا وی هاتینە پێش چاڤێن وی و وەکو فلمەکی ژیانا خۆ دیتیەڤە، ئەڤەژی ب زانست هاتیە سەلماندن.
مالپەرێ ئەتڵەس نیوز بەلاڤکریە، بۆ جارا ئێکێ زانا شیاینە چالاکیێن مەژیێ مرۆڤی پشتی مرنێ تۆمار بکەن.
ئاماژە ب وێ چەندێ ژی کریە، ڤەکۆلەران چاڤدێریا پێلێن مەژیێ زەلامەکی کریە د ژیێ ٨٧ سالیێ دا کو توشبوویێ نەخۆشیا تەبێ (سەرع) بوو و ب ڕێکەفت وی نەخۆشی ژیانا خوە ژدەستدا.
ئەو چەند ژی ئاشکراکریە، زانا شیاینە دەمێ ١٥ دەقیقان پشتی ژیان ژدەستدانێ چالاکیێن مەژیێ وی نەخۆشی تۆماربکەن.
بۆ زانایان دەرکەفتیە، ٣٠ سانیا پشتی مرنێ دلێ مرۆڤی ژ کاردکەڤیت و پشتی وێژی ئێک ژ پێلێن مەژی کو دبێژنێ پێلێن گاما چالاک دبن و بۆ دەمێ ١٥ دەقیقا بەردەوام دبیت.
زانایان دایە دیارکرن ژی، پێلا گاما جۆرە پێلەکا مەژیێ مرۆڤیە کو بەرپرسە ژ ڤەگەڕاندنا بیرەوەری و خەون دیتنێ.
ژ ئالایێ خوە ڤە، ئەجمەل زیمار سەرپەرشتیارێ وێ ڤەکۆلینێ ڕاگەهاند، دەمێ پێلێن گاما چالاک دبن د مەژی دا گرنگترین بیرەوەری و بوویەرێن ژیانێ لبیرا وی دئینیت، گۆتژی، ئەڤ دیتنە دێ هاریکاریا مەکەت بزانین د دەمێ مرنێ دا چ ل مەژیێ مرۆڤیدا دهێت.