سه‌ما
ئيرۆ چارشه‌مبوويێ 27ى تشرينا دووێ 2024ێ، رێوره‌سمێن چنینا زەیتوونا ل پەرستگەها لالش دێ دەست پێ کەن و ماوێ هه‌فتيه‌كێ به‌رده‌وام بن.
لوقمان سلێمان، به‌رپرسێ راگه‌هاندنا په‌رستگه‌ها لالش بۆ سه‌ما راگه‌هاند: ب پشكداريا شكەستى و چلەگر و كەسایەتیێن ئۆلی و خلمه‌تكارێن ئێزدیان، ئيرۆ دێ ده‌ست ب چنینا زەیتوونا ل پەرستگەها لالش ئێته كرن.
گۆتژى: ل داويا كارى دێ ھەموو زەيتوونان خرڤەكەن ل خزينەكى ھەتا ھەيڤا سێ ل بھارێ ل رۆژێن (16-17-18)ى ژ رۆژ مێرا روژھەلاتى دێ جارەكا دى ڤان زەيتونان ھەموويان ب رێورەسم و ب ئاماده‌بوونا بابا شێخ و جڤاتا رۆحانى و ھەموو شكەستى و خێرخوازێن ئێزدى دێ دەست ب دەرئێخستنا ڤان زەيتونان كەن.
ناڤهاتى ديارژى كر، جارەكا دى دێ زه‌يتوونا پاقژكەن و ب ئاڤاكا كانيا سپى باك و تەميز كەن و دێ كەنە زەيت بۆ چرايێن لالش و دڤێت ئەڤ زەيته ژ زەيتونێن گەليێ لالش بت.
به‌رپرسێ راگه‌هاندنا په‌رستگه‌ها لالش دبێژت: پرۆسا چنينێ دێ بۆ ماوێ هه‌فتيه‌كێ ل په‌رستگه‌هێ به‌رده‌وام بت.
ل په‌رستگه‌ها لالش زێده‌ترى 700 دارێن زه‌يتوونا هه‌نه و هه‌ر ساڵ ل ڤى ده‌مێ سالێ ده‌ست ب چنينا وان دئێته كرن.