کاروان حاجی
ئیمان عەبدوڵڵا عەباس، کچەکا خەلکا كۆمه‌لگه‌ها تلقەسەبێ یە (5 کیلۆمەتر) ل باشوورێ شنگالێ. دەمێ داعش کەفتە شنگالێ ل 3ـێ تەباخا 2014ـێ، ئەو تنێ کچەکا 13 سالی بوو. ژ وی تەمەنی، ئیمان ڕووبەڕوویێ وان ترس و نەئارامیان بوویە کو هاتینە سەر خەلکێ وێ دەڤەرێ.
ئەو هێشتا د بەهارا تەمەنێ خۆدا بوو، دەمێ داعش هێرشی شنگالێ کرى. ئیمان چيرۆكێ ڤه‌دگه‌ريته‌ڤه: “من نەدزانی تیرۆر و کوشتن چ بوو، ژ نشکەکێڤە مە دیت خەلک بەرەڤ چیایێ شنگالێ دڕەڤن. ئەم ژی مينا هه‌موويان بەرەڤ چیایی شنگالێ ڕەڤیاین، دەمێ ئەم گەهشتینە دەستپێکا چیایی، ئه‌م نەشیاين سەرکەڤين ئه‌ز ل گه‌ل 32كه‌سێن مالباتا من د به‌راهيا چیایێ شنگالێ دا ده‌سته‌سه‌ركرين و به‌ره‌ڤ ناڤه‌ندا قه‌زا شنگالێ برين. د ڤەگەڕیانێدا من دیمەنێن ب ترس دیتن.”
دەمێ داعش کەفتە شنگالێ ل 3ـێ تەباخا 2014ـێ، ته‌مه‌ن 13 سالی بووم
ل شنگالێ ئەم هەموو ژ هەڤ هاتنە جوداکرن. دگەل 500 کچێن ئێزدی بەرەڤ مووسلێ برین. ل بەر چاڤێن من داعش کەسەک کوشت، هەتا نهۆ ژی ل بیرا منە و نەدڤێت ئەڤ دیمەنێ يێ ترسناك ل بەر چاڤێن خۆ بینم.
ل وی جهی کو ئەم لێ بووین، ئەمیرێن داعشێ دهاتن و کڕین و فرۆتن ب کچان دکرن. کچەکا شنگالی، ناڤێ وێ جیلان بوو، خۆ کوشت ژ ترسان. ئەز ژ مالباتا خۆ هاتبوومە جوداکرن. هەمی ئەمیرێن داعشێ داخوازا گۆهۆڕینا ئاینی ژ مە دکرن و پشتی هنگی ئەم برینە جهەکى، ئەمیرەکێ داعشێ ئه‌م كرينه شڤانێن پەز و دەوارێن خۆ بۆ ماوێ پێنج مەهان.
هەمی ئەمیرێن داعشێ داخوازا گۆهۆڕینا ئاینی ژ مە دکرن
پشتی هنگی، نڤیسینگەها ڕزگارکرنا ڕەڤاندیێن ئێزدی ل دهۆکێ ئەز ڕزگار کرم. بۆ ماوێ سێ ڕۆژ و سێ شەڤان ب پیان ڕێڤە چووم هەتا هاتمە ڕزگارکرن.
ئیمان د ڤه‌گێڕانا چیرۆکا خۆدا دبێژیت: “چ جاران من باوەر نەدکر کو ئەزێ جارەکا دێ تێکەلی جڤاکێ ببم، لێ دەمێ ئەز هاتمە ناڤ خەلکی، من دیت خەلک ب پیرۆزی ل من دنێڕن. ئەڤە ژی بوویە هێز و وزەیەکا باش بۆ من. نهۆ ئەز زمانێن عەرەبی و ئینگلیزی باش دزانم و چوویمە کۆنگرەیێن نێڤدەولەتی بۆ پشتەڤانیا کچێن ئێزدی.”
دگەل کو چیرۆکا ئیمانێ هەردەم بیرەوەریێن درێژ ژ وان ڕوویدانان د دەربڕینێدا دیار دکەت، لێ هەروەسا باسێ داهاتی و گۆهۆڕینا ژیانا خۆ دکەت. ئیمان نە تنێ پاشمایێ چیرۆکەکا نەخۆشە، لێ هەروەسا وێنەیەکا جهێ پەسنێ چاککرنا جڤاکێ یە.
وێ ب تەمامی شیانێن خۆ وەک ژنەکا گەنج و ژیر پێشڤەبر و خۆ وەک ژێدەرەک بۆ هاندانا وان قوربانیێن دی یێن گوندێ خۆ ناساند.
ڕوویدان نیشان ددەن کا چەوا ئیمان و یێن وەک وێ د چەرخا ئاوارەییێدا هێزا خۆ ب کریارێن خۆ پێشکێش کرن دا ژیانا خۆ ژ نوی ڕێکبێخن. مەسەلا سەرەکی د ڤێ چیرۆکێدا ئەوە کو ئیمان و هەڤالێن وێ چەوا شیان ب ڕابوونا ژ تراژیدیێن بوری، خۆ ژ نوی ڕێکبێخن.
لێ نهۆ، ئیمان ب بەشداریکرن د چالاکیێن جڤاکی و سیاسیدا، هەول ددەت دەنگێ وان ئەزموونێن تالی یێن خۆ و هەڤالێن خۆ بگەهینیت.و دده‌ته دياركرن ژى كو ئەو بزاڤان دكه‌ت ب ڕێیا پێشکێشکرنا داخوازیێن قوربانیان و پشتەڤانیا پرۆژەیێن هاریکاريێ، هاریکاریا وان یێن دی بکەت یێن د دەمێ شەڕیدا ڕزگار بووین.
ئیمان هەروەسا بەشداری د کۆنفرانس و چالاکیێن پێشڤەبرنا ئاشتی و مافێن مرۆڤی دا کریە. ئەو بەردەوام هەول ددەت دەنگێ وان قوربانیان بگەهینیت و هەمی ئەوێن ژ دەستێ داعشێ ڕزگار بووین، پشتەڤانی بکەت.
د ماوێ پێنج مەهێن پشتی ڕزگاربوونێ، ئیمان هێشتا شیانا گونجاندنا خۆ دگەل ژیانا کەمپێ و وەرگرتنا پشتەڤانیا دەروونی نەبوو. بۆ ماوێ سێ مەهان، وێ نەدشیا ژ چادرا خۆ دەرکەڤیت و بەرەڤ دەرڤە بچیت و هندەک جاران دترسیا. لێ ب بوورینا دەمی و پشتەڤانیا خەلکێ دۆرماندۆر، ئیمان شیا خۆ بگونجینیت و خۆ ب چالاکی و جڤاکی ببەخشیت. وه‌ك ئيمان وه‌سا بۆ سه‌ما چيرۆكێ دبێژبيت.
ئیمان بزاڤان دكه‌ت کو دەنگێ وان یێن د دەمێ هێرشا داعشێ ل شنگالێ قوربانی بووین بگەهینیت و هاریکاریا وان بکەت. ئەو نە تنێ ب پشتەڤانیکرنا قوربانیان ڕادوەستیت. ئەڤە ژی نیشانا هێز و تێگەهشتنا ئیمانێ یە د ڤەگەڕیانا بۆ ژیانەکا بهێز و سەلامەت پشتی وان ڕوویدانێن تراژیدى.
ئەز گەلەک دلخۆشم کو نهۆ هاریکاریا وان کەسان دکەم ، من ژی هەمان نەخۆشی وەک وان دیتیە
ئیمان ب وێ هه‌مووێ ژی نەڕاوەستیا، هەتا نڤیسینگەهەکا تایبەت ژ لایێ حکوومەتا هەرێما کوردستانێ ل دهۆکێ هاتە ڤەکرن بۆ پشتەڤانی و هاریکاریا ڕزگاربوویێن دەستێ داعشێ. ئیمان بوویە رێڤه‌به‌را پرۆژێ مينحه‌يا دارايى. ئیمان دبێژیت: “ئەز گەلەک دلخۆشم کو نهۆ ئەز هاریکاریا وان کەسان دکەم کو من ژی هەمان نەخۆشی وەک وان دیتیە. هیڤیدارم بكارم هەتا مایم خزمەتا ڕزگاربوویێن دەستێ داعشێ بکەم.”