ناڤەندا نووچەیان – سەما
د ڕۆژەکا وەکو ئیرۆ دا، بەری سالەکێ سەرۆک وەزیرێ عیراقێ ” محه‌مەد شیاع سوودانی ” بۆ ئێکەم جار ب سەرەدانەکا فەرمی گەهشتە باژێرێ شنگالێ، و ل تیپا ٢٠ یا ئارتێشا عیراقێ ، ل سەر ئاستێ کەسایەتیێن ئاینی، جڤاکی، سیاسی و سڤیل پێشوازی لێ هاتە کرن.
چالاکڤانێن سڤیل یێن شنگالێ دبێژن، سەرەدانا بەری سالەکێ یا سەرۆک وەزیرێ عیراقێ، بۆ شنگالێ تژی بوو ژ سۆزان وەک ئاڤاکرنا شنگالێ، ڤەگەراندنا ئاوارەیان و قەرەبووکرنا خەلکێ، زێدەباری دائێخستنا کەیسا ئاوارەبوونێ ب تەمامی و ئاڤاکرنا گوندێ کۆچۆ لێ چ سۆزەک ژ وان نەهاتە ب جهئینان.
ل لایەکێ دیتر دەرباره‌ى ڤی بابەتی جەمال شەشۆ، ئەندامێ ئەنجوومەنێ پارێزگەها نەینەوا بتنێ ب ئێک ڕستەیێ بەرسڤا سەما دا و گۆت: سەرەدانا بەری سالەکێ یا سەرۆک وەزیرێ عیراقێ بۆ شنگالێ( بتنێ حبرە ل سەر کاغەزێ بوو نە زێدەتر).
ل ڕۆژا 3ى ته‌باخا 2014ێ ژ ئەنجامێ هێرشا داعش بۆ سەر شنگالێ و جینۆسایدکرنا ئێزدیان، کەیسا ئێزدیان و ناڤێ شنگالێ ل سەر ئاستێ نێڤدەولەتی دەنگ ڤەدا، زێدەتر ژ ٨٠ ٪ ژ ژێرخانەیا شنگالێ ب تەمامی وێران بوو، سەرێ دەھ سالانە خەلکێ شنگال و ئێزدی چاڤەڕێ نە، نەهامەتیێن وان ب داوی بهێن لێ هەتا نهۆ ژی د ئێش و ئازارێن ئاوارەبوون و دەربەدەریێ دا دژین.