سه‌ما
وەزیرێ پەروەردێ یێ حکومەتا هەرێما کوردستانێ د کونفرانسەکا روژنامەڤانی دا، پشتی کۆمبوونا وی دگەل رێڤەبەرێ گشتی یێ پەروەردا دهۆکێ و رێڤەبەرێن پەروەردێن شێخان و شنگالێ و مامۆستا و سەرپەرشتیار و رێڤەبەرێن قوتابخانێن دەڤەرێن ئێزدینشین راگەهاند، کو هەموو پشتەڤانیێن سەرۆک وەزیران بو وان دوپات کرینەڤە.
ئێك شەمبوويێ 10ێ تشرینا دووێ 2024ێ، ئالان حەمە سەعید د کونفرانسەکا روژنامەڤانی دا پشتی کۆمبوونا وی دگەل رێڤەبەرێ گشتی یێ پەروەردا دهوکێ و رێڤەبەرێن پەروەردێن شێخان و شنگالێ و مامۆستا و سەرپەرشتیار و رێڤەبەرێن قوتابخانێن دەڤەرێن ئێزدینشین راگەهاند: ل سەر مێڤانداریا بنگەهێ لالش، دگەل رێڤەبەرێ گشتی یێ پەروەردا دهوکێ و رێڤەبەرێن پەروەردێن شێخان و شنگالێ و مامۆستا و سەرپەرشتیار و رێڤەبەرێن قوتابخانێن دەڤەرێن ئێزدینشین کۆمبووین و بەرسڤا پێشنیار و تێبینی و داخوازێن وان دا و گۆت: ئەوا پێدڤی ب بریارێ هەبت دێ دەستبجێ بریارێ ل سەر دەین، ئەوا پێدڤی ب پشتەڤانیا ئەنجومەنێ وەزیران هەبت مە دگەل وان بەحس کریە، هەروەسا گۆت: ئەڤە مامۆستایێن دلسوز یێن ڤی وەلاتینە، خزمەتا پرۆسێسا پەروەردێ و فێرکرنێ دکەن.
وەزیرێ پەروەردێ گۆت: چاڤەرێ راپۆرتا بنگەهێ لالش دکەین ب رێکا رێڤەبەریا گشتی یا پەروەردا دهۆکێ کو هەماهەنگیێ دکەن، دێ راپۆرتەکێ بۆ مە هنێرن، گۆتژى: د ماوێ 5 سالێن بۆری دا سەروک وەزیران مەسرور بارزانی پشتەڤانیا قوتابیێن شنگالێ کریە یێن کو ژ پۆلا 12ێ هاتین ل پارێزگەها دهۆکێ ئه‌زمون کرین، د ڤی واری دا سەرۆک وەزیران پتر ژ 500 ملیۆن دیناران ته‌رخانکرینە، هەروەسا سەرۆک وەزیران ئەم راسپاردین بو قوتابیێن رزگاربووی ژ دەستێ داعش، پێدڤییە بەرنامەیەکێ باش و گونجای مە هەبت، لەوما مە قوتابی ژ مەرجان و پەیمانگەهێن حکومی دەرباز کرن، هەروەسا مە کورسی بۆ وان تەرخان کرینە ل پەیمانگەهێن نەحکومی، و مە ئەو دەرباز کرینە بۆ ئەوێن دڤێت بۆ خواندنا لەز ڤەگەرن.
ئالان حەمە سەعید ئاماژە ب وێ چەندێ کر، د بەشەکێ دی یێ گرنگیێن ب خواندن و پەروەردا ئێزدیاتی ڤە ژ پولا ئێکێ هەتا پۆلا 12ێ گوهۆرین د ناڤەرۆک و دیزاینا پەرتووکان دا هاتیە کرن ب چاپەکا نوو بۆ سالا خواندنێ 2024 و 2025 کو کەفتە د ناڤ ناڤەندێن خواندنێ دا.
گۆتژى: د چارچۆڤێ وان 37 هزار و 933 مامۆستایێن وانەبێژ یێن ب بریارا سەرۆک وەزیران بووینە گرێبەست، 970 مامۆستا ئێزدی نە و د وان پەروەردان دا خزمەتێ دکەن.
هەروەسا گۆت: پشتەڤانیێن سەرۆک وەزیران مەسرور بارزانی بۆ قوتابی و مامۆستایێن دەڤەرێن ئێزدینشین مە دوپات کرنەڤە، دگەل پێشنیار و داخوازێن وان کو د داهاتی دا دێ کار ل سەر ئێتە کرن.