ناڤەندا نووچەیان – سەما
ب پشته‌ڤانى يا حكومه‌تا ئه‌لمانيا مونومێنتا جينۆسايدا ئێزديان دێ ل وى وه‌لاتى ئێته دامه‌زراندن و دوو ليژنه بۆ بجهئينانا پرۆژه‌ى هاتنه پێكئينان.
پشتی داخوازیێن بەردەوام ژئالیێ چه‌ند لایه‌نێن ئێزدیانڤه ول گۆڕ خالێن بڕیارا ژ پەرلەمانێ ئه‌لمانيا دەرچووی، ل 16/11/2023ێ، رازیبوون ل سه‌ر چێكرنا سومبلێ جینۆسایدا ئێزدیان ل ئه‌لمانیا ژ ئالیێ پەرلەمانى ڤه هاته پەسەند کرن.
دووشه‌مبوويێ 16ى كانوونا ئێكێ 2024ێ، د. عیرفان ئورتاج، سه‌رۆكێ ناڤه‌ندا شێوه‌رمه‌نديا ئێزديان ل ئه‌لمانيا تايبه‌ت بۆ سه‌ما راگه‌هاند: به‌ريا دوو ڕۆژان نوونه‌رێن 26 رێكخراوێن ئێزديان ل دۆر چاوانيا دروستكرنا مونومێنتا جينۆسايدا ئێزديان كۆمبوون.
سه‌رۆكێ ناڤه‌ندا شێوه‌رمه‌نديا ئێزديان ديار ژى كر، هه‌موو رێكخراوێن ئێزديان ل سه‌ر دانانا مونومێنتێ رێككه‌فتن و دو ليژنه ژى بۆ ب رێڤه‌برن و بجهئينانا پرۆژه‌ى هاتنه پێكئينان.
ل 19/1/2023ێ، پەرلەمانێ ئەڵمانیا كه‌يسا ئێزديان وه‌كو جینۆساید ناساند.
رێكخراوا داعش يا تيرۆرستى ل 3ى ته‌باخا 2014ێ هێرشى قه‌زا شنگالێ كر و جينۆسايد ده‌رهه‌قێ خه‌لكێ وێ دا ئه‌نجامدان و ب سه‌دان كه‌س هاتنه كوشتن و ب هه‌زاران هاتنه ره‌ڤاندن و ده‌ربه‌رده‌ركرن.
تا نوكه پترى 18 وه‌لات و ده‌سته‌يان ل سه‌رانسه‌رى جيهانێ دان ب ناساندنا جینۆسیایدا ئێزدیان كريه.