ناڤەندا نووچەیان – سەما
ده‌رگه‌هێ ئه‌ندامبوونا بنگه‌هێ لالش بۆ گه‌نجێن ئێزدى ل دووڤ مه‌رجان دێ ڤه‌كرى مينت و ب رێيا تايى و نڤيسينگه‌هێن لالش ل ده‌ڤه‌رێن ئێزديان ناڤ دێ ئێنه تۆماركرن.
ده‌سته‌يا بلندا بنگه‌هێ يێ ره‌وشه‌نبيرى و كۆمه‌ڵايه‌تى ل دهۆكێ رێككه‌فتى 25/12/2024ێ،وه‌كو داوى ژڤان بۆ ئه‌ندامبوونێ ل بنگه‌هێ لالش دياركريه.
كاروان باعه‌درى، به‌رپرسێ راگه‌هاندنا بنگه‌هێ لالش ل دهۆكێ، ئيرۆ 14ى كانوونا ئێكێ 2024ێ، بۆ سه‌ما گۆت:” لدووڤ پەیرەوپرۆگرامێ بنگه‌هى، بۆ بتر پشتەڤانى یا گەنج و ئەكادیمیێن ئێزدى بۆ هندێ بتر دەلیڤە ل بەر وان یا ڤەكری بت، بريار هاتيه دان تا 25ى ڤێ مه‌هێ دەرگەهێ ئەندامبوونێ ل تايى و نڤيسينگه‌هێن لالش ڤه‌كرى بمنيت، بۆ هندێ كەسەكێ نەگەهشتی بێت ئەندامەتیبوونا خۆ نوو كەتە ڤە دەرفەتەكا دی بۆ چێكەت”.
به‌رپرسێ راگه‌هاندنا بنگه‌هێ لالش دبێژت:” وه‌رگرتنا ئه‌ندامێن نوو دێ ل گۆڕه‌ى جوگرافيا ده‌ڤه‌رێ بت، ب رێيا تايى و نڤيسينگه‌هێن لالش ل ده‌ڤه‌رێن ئێزديان ناڤ دێ ئێنه تۆماركرن”.
كاروان باعه‌درى، ئاماژه ب وێ چه‌ندێ دا، لدووڤ ڤان مه‌رجان ئه‌ندامێن نوو دئێنه وه‌رگرتن، ئێك: دەرچوویێ ئامادەیى یان بلندتر بت, یان نڤیسین و ڤەکۆلین هەبت ل سەر ئۆلا ئێزدیا،دو: دوو وێنێن کەسایەتی یێن رەنگا و ڕەنگ دگەل ناسناما بارێ شارستانی بینت و دێ فۆرمەکا تایبەت پڕكه‌ن.
بنگه‌هێ لالش، ئێكه ژ مه‌زنترين ناڤه‌ندێن ره‌وشه‌نبيرى و كۆمه‌ڵايه‌تى يێن ئێزديان ل سه‌رانسه‌رى جيهانێ، هه‌ژماره‌كا زۆر يا ئه‌ندامان هه‌نه كو نێزيكى هه‌فت هه‌زارانه، هه‌روه‌سا چه‌ندين تايى ل ده‌ڤه‌رێن شێخان، شنگال، ده‌ڤه‌را باشيك و به‌حزانێ، شاريا و خانكێ و چه‌ندين نڤيسينگه‌هـ ل گوند و كۆمه‌لگه‌هێن ئێزديان هه‌نه.