ناڤەندا نووچەیان – سەما
رێكخراوا چاڤدێريا مافێن مرۆڤى (هيومه‌ن رايتس وۆچ) د راپۆرتا خۆ يا سالا 2024ێ دا دياردكه‌ت كو ئازاديا ده‌ربڕينێ و مافێن مرۆڤى ل عيراقێ ب شێوه‌يه‌كى گشتى د پاشڤه‌چوونێ دا نه.
رێكخراوێ ئه‌ڤرۆ پێنجشه‌مب راپۆرتا خۆ يا سالانه (بۆ سالا 2024ێ) به‌لاڤكريه، د راپۆرتێ دا ده‌رباره‌ى عيراقێ دبێژيت “حكومه‌ت و په‌رله‌مانێ عيراقێ سالا چويى هنده‌ك ياسا و بڕيار ده‌رئێخستن كو دژى مافێن مرۆڤى بوون، ئێك ژوان گوهۆرينا ياسايا بارێ كه‌سى بوو، هه‌روه‌سا چه‌ندين هه‌لمه‌تێن گرتنێ بۆ راما جودا و كه‌سێن ئۆپۆزسيۆنێ هاتنه ئه‌نجامدان، كو هه‌مى ئه‌ڤ تشته بوونه ئه‌گه‌رێ هندێ كو عيراق د رێزبه‌نديا ئازاديا ده‌ربڕينێ و مافێن مرۆڤى دا پاشڤه بچيت”.
هه‌روه‌سا دبێژيت: “عيراقێ سالا بۆرى ژماره‌كا زۆر يا فه‌رمانێن سێداره‌دانێ جێبه‌جێكرن، هه‌روه‌سا گه‌له‌ك به‌لگه هه‌نه كو دسه‌لمينن ل گرتيخانان بۆ دانپێدانانێ ئه‌شكه‌نجا گرتيان هاتيه دان، سه‌ربارى هندێ ل عيراقێ كارێ نێرده‌يێن نێڤده‌وله‌تى بۆ لێكۆلينێ د تاوانێن رێكخراوا داعشێ دا هاته راوه‌ستاندن، ئه‌ڤه ژى بوويه جهێ نيگه‌رانيا قوربانيان”.
رێكخراوا هيومه‌ن رايتس وۆچ ئاماژه ب وێ چه‌ندێ ژى دايه كو عيراق بۆ سالا نوى ده‌رفه‌ته‌ك ل به‌ر ده‌ستێ وێ يه بۆ گوهۆرين و باشتركرنا ره‌وشا مافێن مرۆڤى و ئازاديا ده‌ربڕينێ و پاراستنا ئه‌من و ئاسايشێ ل وه‌لاتى.
راپۆرتا رێكخراوا چاڤدێريا مافێن مرۆڤى ژ 546 روپه‌لان پێكهاتيه و تێدا ره‌وشا مافێن مرۆڤى ل 100 وه‌لاتان بۆ سالا 2024ێ هاتيه دياركرن.