ناڤەندا نووچەیان – سەما
شیرەتكارێ سەرۆكوەزیرێن عیراقێ راگەهاند، 1400 پۆلیس كو ئاكنجیێن شنگالێنە بۆ وی باژێری هاتنە دامەزراندن و پرۆسا دامەزراندنێ بەردەوامە.
خەلەف شنگالی، شیرەتكارێ محەمەد شیاع سوودانی بۆ كاروبارێن كوردین ئێزدی راگەهاند: د چارچووڤێ بجهئینانا رێكەڤتنا شنگالێ هەتا نوكە 1400 كەس بۆ پۆلیسێن خۆجهی ل قەزا شنگالێ هاتنە دامەزراندن.
لدووڤ رێكەفتنێ، دو هه‌زار و 500 پۆلیس كو خەلكێ دەڤەرێنە بۆ پۆلیسێن خۆجهییا شنگالێ دێ ئێنە دامەزراندن.
رێكەفتنا دناڤبەرا حكومەتا هەرێما كوردستانێ و حكومەتا عیراقێ ژبۆ ئاساییكرنا رەوشا شنگالێ ل چریا ئێكێ یا سالا 2020ێ هاتبوو ئیمزاكرن.
ئەو رێكەفتن هەرسێ لایەنێن ب رێڤەبرن، ئەمنی و ئاڤەدانكرنێ ژی ل شنگالێ ب خۆڤەدگرت.
ب گۆتنا شیرەتكارێ سەرۆكوەزیرێن عیراقێ ، پۆلیسێن خۆجهی ل قەزا شنگالێ پێدڤى ب کارمەندێن زێده‌ترە بۆ باشتر ب رێڤه‌برنا کاروباران، پرۆسەیا دامەزراندنا پۆلیسان ل قەزايێ دێ بەردەوام بت.