سەرۆک بارزانی ده‌رباره‌ى هەلوەشاندنا بڕیارێن جڤاتا سەركرداتییا بەعسا هەلوەشیایی راگه‌هاند:ئەو بڕیارە د جهێ خۆدایه و ڤه‌گەراندنا مافییه بۆ خودان مافان، هه‌روه‌سا هیڤیدارم ئەڤە دەستپێكه‌ك بت بۆ ڕاستكرنا هەموو شاشيان.
ئه‌ڤه ده‌قێ په‌ياما سه‌رۆك بارزانی يه:
ب ناڤێ خودایێ مەزن و دلۆڤان
پشتی ده‌مه‌كێ زۆر ژ روخاندنا ڕژێما پێشتر یا عێراقێ، سەرئەنجام ئەڤڕۆ په‌رله‌مانێ عێراقێ د پێنگاڤه‌كا گرنگدا دەنگ ب “پڕۆژە قانوونا هەلوەشاندنا بڕیارێن جڤاتا سەركرداتییا بەعسا هەلوەشیایی” دا كو یا تایبەتە ب ڤه‌گەڕاندنا ئه‌ردی بۆ خودانێن وان یێن ڕەسەن” ئەو بڕیارە د جهێ خۆدایه و ڤه‌گەراندنا مافییه بۆ خودان مافان، ب ڤێ هه‌لكه‌فتێ دەستخۆشییێ ل سەرۆكاتییا په‌رله‌مانێ عێراقێ و فڕاكسیۆنێن كوردستانی و هه‌موو ئەوان لایەنان دكەم كو ڕۆل د ده‌ربازكرن و پەسەندكرنا ئەوێ پڕۆژە قانوونێ دا هەبوویە و سوپاسییا وان دكەم.
هیڤیدارم ئەڤە دەستپێكه‌ك بیت بۆ ڕاستكرنا هەموو ئەوان شاشی و نه‌ڕاستیان یێن كو ل دژی بەرژەوەندییا وه‌لاتییێن عێراقی ب درێژاهییا دیرۆكا دەوله‌تا عێراقێ هاتینه ئەنجام دان.
مه‌سعود بارزانی
21 ی كانوونا دووێ 2025
