ناڤەندا نووچەیان – سەما
وەزارەتا کۆچ و کۆچبەرێن عیراقێ دێ د رۆژێن داهاتی دا 150 خێزانێن داعشێ ل کەمپا هۆڵێ ل سووریێ بۆ کەمپا جەدعە ل نەینەوا ڤەگوهێزت.
دوهی ڕۆژا ئێک شەمبوویێ 26ی کانوونا دووێ 2025ێ، مەحما خەلیل، ئەندامێ پەرلەمانێ عیراقێ ل سەر فراکسیۆنا پارتی دیموکراتی کوردستان راگەهاند: دەربازبوونا ڤان خێزانان ب باژێرێ شنگالێ دا کو داعش تێدا جینۆساید ئەنجام دا و تایبەت دژی پێکهاتەیا ئێزدی، ئەڤە هەستێن مە دئێشینیت، وەزارەت پتر گرنگیێ ددەتە خێزانێن داعشیان کو وەک بۆمبێن دەمکی نە و دشێن ل هەر دەمەکی بتەقن، ژ قوربانیێن داعشێ.
گۆتژی:”وەزارەت ب ڤان کریاران خەلاتا جەلادی ددەت و سزایێ قوربانیان و خێزانێن شەهیدان ل شنگال و سپایکەر و جهێن دی ددەت، ئەڤ بڕیارە پشتی پەسەندکرنا یاسایا لێبوورینا گشتی هاتیە دان، کو گەلەک پرسیاران دروست دکەت”.
ئەندامێ پەرلەمانێ عیراقێ دوپاتکر، دێ پرسیارەکا پەرلەمانی ئاراستەی وەزیرا کۆچ و کۆچبەران کەین، هەروەسا دێ ژ حکومەتێ پرسیت کا سەدەما ڤەگوهاستنا خێزانێن داعشیان چییە، ئەرێ ئەڤە کریارەکا ئاسایی یە یان ب فشارا نێڤدەولەتی دئێتە کرن.