ناڤه‌ندا نووچه‌يان – سه‌ما
مينحه‌يا دارایی یا مەسرور بارزانی، سەرۆکێ حکومەتا هەرێما کوردستانێ، بۆ ئێزدیێن ڕزگاربوویێن ژ دەستێ ڕێکخراوا تیرۆرستی یا داعشێ دئێته دان.
فه‌رمانگه‌ها ميديا و زانيارى يا حكومه‌تا هه‌ريما كوردستانێ راگه‌هاندييه، بۆ ماوێ 7 هەیڤان، 2 هه‌زار و 128 ئێزدیێن ڕزگاربوویێن ژ دەستێ داعش هاریکاریێ وەردگرن و پرۆسا تۆمارکرنا ناڤان دێ بەردەوام بت هەتا 3 هه‌زار و 575 ڕزگاربووی ته‌مام دبن.
ئاماژه ب وێ چه‌ندێ دا، مينحه‌يا سەرۆکوەزیران بۆ ڕزگاربوویێن ژ دەستێ داعش هەموو ئەندامێن مالباتێن ڕزگاربوویان ڤەدگریت، زێده‌بارى ئەوێن ل دەرڤەی وەلاتی ژی هاریکاری دگەهیتێ.
فه‌رمانگه‌ها ميديا و زانيارى راگه‌هاندييه ژى: د ڤێ چارچووڤه‌يى دا، ل 5 جهێن سنوورێ دهۆک و زاخۆ، ب شێوەکێ ڕێکخستی و مەهانە، مينحه دئێتە دابەشکرن و پرۆسە دێ بەردەوام بت.
هه‌روه‌سا دياركر، ل مەها تەمموزا 2024ێ، مەسرور بارزانی، سەرۆکێ حکومەتا هەرێما کوردستانێ، پرۆژێ پشتەڤانیا دارایی بۆ ڕزگاربوویێن ژ دەستێ داعش ڕاگەهاند، و ل مەها ته‌باخا هەمان سالێ، پرۆژە کەفتە دوارێ جێبەجێکرنێ دا و بەردەوامە.
دوپاتكرييه، ئەڤ هاریکاریا بەردەوام یا سەرۆکێ حکومەتا هەرێما کوردستانێ، ژ ئەگەرێ هەستکرنا وى ب وان ئێش و زیانێن کو د هێرشا ڕێکخراوا تیرۆرستی یا داعشێ دا ب سەرێ کوردێن ئێزدی دا هاتینە و ژ وێ چەندێ گەلەک قوربانی داينە.