ناڤه‌ندا نووچه‌يان – سه‌ما
مه‌حما خه‌ليل، ئه‌ندامێ په‌رله‌مانێ عيراقێ ل گه‌ل ئه‌ندازيار سه‌عه‌د ئه‌مين، سه‌رۆكێ سندۆقا دووباره ئاڤه‌دانكرنا ده‌ڤه‌رێن زيانڤێكه‌فتى يێن كريارێن تيرۆرى و له‌شكه‌رى كۆمبوو.
نڤيسينگه‌ها مه‌حما خه‌ليل، ئه‌ندامێ په‌رله‌مانێ عيراقێ دياركر، د ديدارێ دا، په‌رله‌مانتارى باس ل سته‌ما دپشكا پرۆژه‌يان دا بۆ قه‌زا شنگال و ناحيا گرعزێر دا كر و داخوازكر پتر گرنگى ب ئه‌ڤان ده‌ڤه‌ران بێته دان.
هه‌روه‌سا ئاماژه ب وێ چه‌ندێ دا، سندۆقا ئاڤه‌دانكرنا شنگالێ نابت ببته به‌هانه‌يه‌ك كو پرۆژه‌يێن گه‌شه‌پێدانێ نه‌ئێنه ئه‌نجامدان و دياركر، نيازا چێكرنا چه‌ند رێكان ل شنگالێ هه‌يه.
وى ئه‌ندامێ په‌رله‌مانى داخواز زێده‌كرنا پشكا پرۆژه‌يان بۆ كه‌رتێ په‌روه‌ردێ كر، ژبه‌ر گرنگيه‌كا مه‌زن هه‌يه و گه‌له‌ك زيان ب قوتابخانه‌يان كه‌فتيه.
ل گۆڕه‌ى زانياريان و به‌رپرسێن شنگالێ، تيرۆرستێن داعشێ زيانه‌كا مه‌زن گه‌هانديه ژێرخانه‌يا شنگالێ و هێشتا نێزيكى 70% ژێرخانه‌يا وى باژێرى يا وێرانه و نه‌هاتيه ئاڤه‌دانكرن.