ناڤه‌ندا نووچه‌يان – سه‌ما
به‌رده‌وامیدان ب گه‌هاندنا پرۆژێن خزمه‌تگۆزارى ل سنورێ ده‌ڤه‌رداریا سێمێلێ، پارێزگارێ دهۆكێ به‌رێ بنياتى بۆ هه‌ژماره‌كا پرۆژه‌يان ل سێمێڵێ و ناحيا خانكێ دانا.
دوهى رۆژا چارشه‌مبوويێ 12-3-2025ێ، د.عه‌لى ته‌ته‌ر، پارێزگارێ دهۆكێ ب ئاماده‌بونا خه‌لیل مه‌حمود، ده‌ڤه‌ردارێ سێمێلێ و دیار به‌حرى، رێڤه‌به‌رێ گشتى یێ باژێرڤانیا ل پارێزگه‌ها دهۆكێ وچه‌ند به‌رپرسێن حزبى وئیدارى، به‌رێ بنیاتى بۆ ڤه‌گوهاستنا رێره‌وێ بوریا ئاڤێ یا (900)ملم ژناڤ پارچه زه‌ڤیێن ئاكنجیبوونێ ل سێمێلێ و كونكریتكرنا شوسته‌یان و كه‌لپیچێ هه‌ڤگرتى ل ناحيا خانكێ ب كوژمێ 833 ملیۆن دینارا دانا.
پاشى پارێزگارێ دهۆكێ دكۆنگره‌كێ رۆژنامه‌ڤانی ئه‌نجامدا و گۆت: ل دووڤ راسپارده‌یێن سه‌رۆكێ حكومه‌تا هه‌رێما كوردستانێ رێزدار مه‌سرور بارزانى ، كاروانێ ئاڤه‌دانیێ دێ یێ به‌رده‌وام بت وخواست كو هه‌موو پرۆژه ب كوالیتیه‌كا باش ول ده‌مێ ده‌ست نیشان كرى ب كه‌ڤنه دخزمه‌تا خه‌لكێ ده‌ڤه‌رێ دا.
ژلايێ خۆڤه ئه‌ندازيار خێرى جه‌عفه‌ر، سه‌رۆكێ باژێرڤانيا خانكێ بۆ سه‌ما گۆت: ئه‌ڤه قۆناغا سيێ يه به‌رێ بنياتى بۆ كونكریتكرنا شوسته‌یان و كه‌لپیچێ هه‌ڤگرتى ل جادا سه‌ره‌كى ل ناحيا خانكێ دئێته دانان و پرۆژه‌كێ گرنگه ب تايبه‌ت بۆ هاتن و چوونا قوتابيان و خه‌لكێ.
حكومه‌تا هه‌رێما كوردستانێ گرنگيه‌كا زۆر ب وارێ ئاڤه‌دانيێ ل خانكێ دده‌ت و چه‌ندين پرۆژێن خزمه‌تگۆزارى بۆ خۆشكرنا ژيانا وه‌لاتيان ئه‌نجامداينه.
خانكێ سه‌ر ب قه‌زا سێمێلێ ڤه‌يه و دكه‌فته لايێ رۆژئاڤايێ پارێزگه‌ها دهۆكێ و پتريا خه‌لكێ وێ ئێزدينه.