ناڤه‌ندا نووچه‌يان – سه‌ما
ئيرۆ چارشه‌مبوويێ،12-3-2025ێ، ده‌زگه‌هێ خێرخوازيێ بارزانى ل هه‌ولێرا پايته‌خت چالاكيه‌ك بۆ دلخۆشكرنا زارۆكێن كۆچبه‌رێن ئێزدى يێن ل وه‌لاتێ لوبنانێ گه‌هشتينه كه‌مپا مام ره‌شان سازكر.
دڤێ چالاكيێ دا و ب مه‌ره‌ما په‌يداكرنا گرنژينێ ل سه‌ر دێم و سيمايێ زارۆكان، ل ده‌ستپێكێ سه‌ره‌دانه‌ك برنه يانه‌يا هه‌سپ سواريێ و ده‌مه‌كێ خۆش بۆراندن.
لدووڤدا گه‌ريانه‌ك ل ناڤا ماجدى مۆل كرن و بۆ هه‌ر زارۆكه‌كى جلوبه‌رگ هاتنه دابينكرن و پتر كه‌يفخۆشبوون.
پاشان ل ده‌مێ نيڤرۆ نانخوارنه‌ك بۆ وان هاته به‌رهه‌ڤكرن و دبه‌رده‌واميا چالاكيێ دا پاكێجه‌ك بۆ زارۆكێن ته‌مه‌نێ وان كێمتر ژ ساله‌كێ هاته ئاماده‌كرن و هه‌موو پێدڤيێن زارۆكان تێدابوون.
زارۆكێن كۆچبه‌رێن ئێزديێن عه‌فرينێ ل رۆژئاڤايێ كوردستانێ دڤێ چالاكيێ دا هه‌سته‌كێ خۆش بۆ وان په‌يدابوو، ژبه‌ركو ئه‌وان ل ده‌مێن چه‌ند سالێن بورى دا چه‌ند جاران ده‌ربه‌ده‌ر و ئاواره‌بوون و ترس و نه‌خۆشى ديتينه و دره‌وشه‌كا په‌ريشان دا ژياينه، داوى جار كۆچبه‌رى وه‌لاتێ لوبنانێ ببوون.
نوكه ئه‌و زارۆك ل كه‌مپا مام ره‌شان ل قه‌زا شێخان ئاكنجينه و هه‌رێما كوردستانێ وه‌ك په‌ناگه‌هه‌كا ئارام بۆ خۆ دبينن و ب ئارامى و سه‌قامگێرى ژيانا خۆ ده‌رباز دكه‌ن، ب تايبه‌ت پشتى ده‌زگه‌هێ خێرخوازيێ بارزانى خۆ ل ره‌وشا وان كريه خودان و به‌رده‌وام هاريكاريا خێزانێن وان دكه‌ت.
پشتى تێكچوونا ره‌وشا سووريێ هه‌ژماره‌كا خێزانێن كۆچبه‌رێن كوردێن ئێزدى يێن باژێرێ عه‌فرينێ، كۆچبه‌رى وه‌لاتێ لوبنانێ بوون و دژيانه‌نه‌كا ب زه‌حمه‌ت دا دژيان، لڤێ داويێ ره‌وشا وه‌لاتێ لوبنانێ ژى تێكچوو، ئه‌وان هانا خۆ گه‌هانده سه‌رۆك بارزانى و ده‌زگه‌هێ خێرخوازيێ بارزانى ب هانا وان چوو و ڤه‌گوهاستنه هه‌رێما كوردستانێ.