سه‌رۆک وه‌زیران مه‌سرور بارزانی رۆژا جلوبه‌رگێن نه‌ته‌وه‌یی پیرۆز دکه‌ت

ناڤەندا نووچەیان – سەما
دووشه‌مبوويێ، 10-03-2025، سه‌رۆک وه‌زیران مه‌سرور بارزانی، د په‌یامه‌کێدا ل تۆڕا جڤاکی یا ئێکس، رۆژا جلوبه‌رگێن نه‌ته‌وه‌یی ل هه‌موو پێکهاته و نه‌ته‌وه‌یێن هه‌رێما کوردستانێ پیرۆز کر.

سه‌رۆک وه‌زیران مه‌سرور بارزانی دگه‌ل په‌یاما خۆ، ڤیدیۆیه‌ک ژی به‌لاڤ کریه و ل سه‌ر نڤیسیه: ” ڕۆژا جلكێن نەتەوەیی، جوانییا هەمەڕەنگییا که‌لتووری و پێكڤه‌ژیانا ئاشتییانە یا کوردستانا مه‌ نیشان دده‌ت.”

جلوبه‌رگ ئێک ژ نیشانێن سه‌ره‌کی یێن ناسناما نه‌ته‌وه‌یی یه و گه‌ل و نه‌ته‌وه‌یان ژ ئێک جودا دکه‌ت. ل هه‌رێما کوردستانێ ژی، رۆژا 10ێ ئادارێ وه‌ک رۆژا جلێن نه‌ته‌وه‌یی هاتیه دیارکرن و هه‌ڤوه‌لاتی د ڤێ رۆژێدا جلوبه‌رگێن ره‌نگاوره‌نگ یێن نه‌ته‌وه‌یی یێن خۆ دكه‌نه‌ به‌ر خۆ.

جلوبه‌رگێن کوردی دیرۆکه‌کا که‌ڤن هه‌یه و ل گۆر ده‌ڤه‌ران ژی شێوازێ دیزاین و دوورینا وان دگوهۆرت، دگه‌ل گوهۆڕینێن سه‌رده‌می ژی گوهۆڕین د مۆدێلێن جلوبه‌رگێن ره‌سه‌ن یێن کوردی دا هاتینه کرن، به‌لێ هێشتا ره‌سه‌نایه‌تی و مۆرکا خۆ ژ ده‌ست نه‌دایه و ب ئێک ژ جلوبه‌رگێن نه‌ته‌وه‌یی یێن جوان تێ هه‌ژمارتن ژبه‌ر ره‌نگاوره‌نگی و شێوازێ تایبه‌ت یێ کو هه‌یی ب تایبه‌ت جلوبه‌رگێن کوردی یێن ژنان.