بیست و دوو سالان بەری نوکە، ڕژێما بەعس ل عيراقێ ژناڤچوو و پەیکەرێ سەدام حوسێنى ل مەیدانا فیردەوس ل بەغدا هاتە شکاندن. هەڤپەیمانان ب سەرۆکاتیا ئەمریکا د 20ـێ ئادارا 2003 دەستپێکرنا ئۆپەراسیۆنێ ل سەر عيراقێ کرن و هەتا 1ـێ ئه‌یارا هەمان سالێ بەردەوام بوو.
پشتی چەندین هۆشداریان بۆ سەدام حوسێنى، ئەمریکا دەستپێکرنا ئۆپەراسیونا ل سەر عيراقێ کر. ناڤێ ئۆپەراسیۆنێ “ئازادکرنا عێراقێ” بوو، و د ماوەیێ کێمتر ژ مەهەکێ دا ڕژێما سەدامى هاته رووخاندن.
ئەمریکا د 20ـێ ئادارا 2003 دەستپێکرنا ئۆپەراسیونا ئازادکرنا عيراقێ کر. ئەڤ ئۆپەراسیۆنە 41 ڕۆژان بەردەوام بوو. د 9ـێ نیسانا 2003 دا، هێزێن هەڤپەیمانان ژ چەندین ئاراستەیان ڤە چوونە ناڤ بەغدایێ پایتەختا عێراقێ. ب ڤی ئاوایی زەنگێ ڕووخاندنا ڕژێمێ لێکەفت و پەیکەرێ سەدامى ل مەیدانا فیردەوس ل بەغدا هاتە شکاندن.
هەڤپەیمانان ب سەرۆکاتیا ئەمریکا 177 هه‌زار سەرباز ل عيراقێ بەلاڤکرن. پرانیا سەربازان ئەمریکی بوون، ژمارا وان 130 هه‌زار سەرباز بوون. بریتانیا ژی 45 هه‌زار سەرباز، ئوسترالیا 2 هه‌زار سەرباز و پولەندا 194 سەرباز. ئارمانجا ڤێ ئۆپەراسیۆنێ ژناڤبرنا ڕژێما سەدامى بوو، و د دەمەکێ کێم دا ب سەرکەفتن ئەرک هاتە جێبەجێکرن.
پشتی ئەرکێ هەڤپەیمانان ب سەرکەفتن ب دوای هاتى، جۆرج بوشێ کوڕ، سەرۆکێ وی دەمێ یێ ئەمریکا و فەرماندەیێ هێزێن هەڤپەیمانان، ل سەر کەشتیا شەڕی یا ئەبراهام لینکۆلن ل دەریایا ناڤەڕاست، گۆتارا سەرکەفتنێ و بداوی هاتنا ئەرکێ هەڤپەیمانان پێشکێشکر. بوش ڕاگەهاند کو “ئۆپەراسیۆنا وان ل عيراقێ ب داوی هات و ڕژێما سەدامى ژناڤچوو، ئەمریکا و هەڤپەیمان سەرکەفتن.”
ژێده‌نر: كوردستان 24