ناڤه‌ندا نووچه‌يان – سه‌ما
مەسرور بارزانی پابەندبوونا حکومەتا هەرێمێ بۆ خزمەتکرنا زێدەتر یا خێزانێن شەهیدان دووپات دکەت و ب پێدڤى دزانت، حكومه‌تا فيدراڵ ئه‌وان قه‌ره‌بوو بكه‌ت.
دووشەمبوويێ، 14-04-2025، مەسرور بارزانی، سەرۆکێ حکومەتا هەرێما کوردستانێ، ل سالڤەگەرا ئەنفالێدا، د پەیامه‌کێ دا ڕاگەهاند”د 37 سالڤەگەرا ئەنفالێدا، ب ڕێزگرتنڤە ڤێ ڕۆژێ شەهید و قوربانیێن جینوسایدا ئەنفالێ دکەین، یا کو رژێما بەرێ یا عیراقێ، ب دەهان هزاران خەلکێ بێ تاوان یێ کوردستانێ برن بیابانێن باشوور و ناڤەراستا عیراقێ و د گورێن بکۆمدا زیندی بچال و بێ سەر و شوین کرن.”
دەقێ پەیاما مەسرور بارزانی، سەرۆکێ حکومەتا هەرێما کوردستانێ، ل سالڤەگەڕا ئەنفالێدا:
د 37 سالڤەگەرا ئەنفالێدا، ب ڕێزگرتنڤە ڤێ ڕۆژێ شەهید و قوربانیێن جینوسایدا ئەنفالێ دکەین، یا کو رژێما بەرێ یا عیراقێ، ب دەهان هزاران خەلکێ بێ تاوان یێ کوردستانێ برن بیابانێن باشوور و ناڤەراستا عیراقێ و د گورێن بکۆمدا زیندی بچال و بێ سەر و شوین کرن.
جینوسایدا ئەنفالێ، تاوانەکا مەزن بوو ل دژی ئاخ و خەلکێ کوردستانێ هاتیە ئەنجامدان و هەتا نوکە، ئەنجام و کاریگەریێن ڤێ کومکوژیێ هەر مایین و پێدڤیە حکومەتا فیدرالی، ب هەستکرن ب ئەرک و بەرپرسیارەتییا یاسایی و دەستوری و ئەخلاقییا خۆ، کەس و کار و مالبات و هەموو زیانلێکەفتیێن جینوسایدا ئەنفالێ و هەمی ستەملێکریێن دیتر یێن دەستێ رژێما بەعس، ژ لایێ مادی و مەعنەویڤە قەرەبوو بکەت.
د سالڤەگەرا ڤێ تاوانا شوڤینیدا، حکومەتا هەرێما کوردستانێ پابەندبوونا خۆ بۆ خزمەتکرنا زێدەتر یا کەسوکار و مالباتێن سەربلند یێن ئەنفالکری و شەهیدێن کوردستانێ دووپات دکەت.
سلاڤ ل گیانێ پاکێ شەهیدێن کوردستانێ بیت.
مەسرور بارزانی
سەرۆکێ حکومەتا هەرێما کوردستانێ