ناڤه‌ندا نووچه‌يان – سه‌ما
ل رۆژا چوارشه‌مبوويێ، حسێن عامرى ئه‌ندامێ لیژنا ئێمناهى و به‌رگرىێ ل په‌رلەمانێ عيراقێ دیارکر، ڤه‌گه‌ریانا هنده‌ک مالباتێن عيراقێ ژ که‌مپێن “هۆل و حه‌سه‌کێ” بۆ وه‌لاتى لدووڤ رێککه‌فتنه‌کا به‌رێ دناڤبه‌را حکومه‌تا عيراقێ و نه‌ته‌وه‌يێن ئێکگرتى بوویه.
عامرى بۆ ئاژانسا شه‌فه‌ق نیوز گۆت: “رێککه‌فتن به‌رى چه‌ند سالان هاتیه کرن، ب رێیا ده‌زگه‌هێ هه‌والگرى یێ عيراقێ، و دبێژت کو ل هه‌ر جاره‌کێ دێ 50 که‌س ئێنه وه‌رگرتن، و دێ ئێنه دانان ل ناڤه‌ندێن تایبه‌ت بۆ نووژه‌نکرنا وان ژ لایێ ده‌روونى و جڤاکى ڤه.”
وى زێده‌کر کو “ڤه‌گه‌ریانا ڤان مالباتان بۆ جهـێن وان یێن ڕه‌سه‌ن دێ کە‌فته بن چاڤدێریا ده‌زگه‌هێ هه‌والگرى و ئه‌منێ نه‌ته‌وه‌یى، و ب شێوه‌یه‌کى کو به‌رژه‌وه‌نديا جڤاکى و ئه‌منى مسۆگه‌ر بکه‌ت.”
ل دووڤ گۆتنا به‌رپرسێ نڤیسینگه‌ها ده‌رکه‌تنێ ل که‌مپا هۆلێ شوکرى حه‌جى، بۆ ئاژانسا شه‌فه‌ق نیوز، ئه‌ڤ گه‌شته کۆما هه‌شتێ یه ژ ده‌ستپێکا سالا 2025 و گه‌شتا 25 ژ گه‌شتێن ڤه‌گه‌راندنا عيراقیان بۆ وه‌لاتێ وان یه.
ژ سالا 2021 ڤه، حکومه‌تا عيراقێ، ب هه‌ڤکاریا رێکخراوێن نێڤده‌وله‌تى، ده‌ست ب جێبه‌جێکرنا پلانه‌کێ بۆ ڤه‌گه‌راندنا مالباتێن عێراقى ژ که‌مپێ بۆ وه‌لاتى کرىه، کو ئه‌و ل که‌مپا جه‌ده‌عه دئێنه وه‌رگرتن بۆ پێگه‌هاندنا وان ژلایێ جڤاکى و ده‌روونى ڤه.