ناڤه‌ندا نووچه‌یان – سه‌ما
قايممقامێ قه‌زا شنگالێ ب وه‌كاله‌ت راگه‌هاند، سندۆقا ئاڤه‌دانيا شنگالێ و ده‌شتا نه‌ينه‌وا خزمه‌تا خه‌ڵكێ ده‌ڤه‌رێ ناكه‌ن.
ئێك شه‌مبوويێ 18ى ئه‌يارا 2025، نايف سه‌يدۆ، قايمقامێ قه‌زا شنگالێ ب وه‌كاله‌ت بۆ سه‌ما گۆت: پشتى جينۆسايدا ئێزديان ل سه‌ر ده‌ستێ تيرۆرستێن داعشێ ل ته‌باخا سالا 2014ێ و تانوكه گه‌له‌ك زۆردارى ل شنگالێ بوويه ب تايبه‌ت ژ لايێ ژێرخانه و ئاڤه‌دانيێ ڤه، ئه‌و سندۆقا نوكه يا بناڤێ ئاڤه‌دانيا شنگال و ده‌شتا نه‌ينه‌وا هاتيه ئاڤاكرن، خزمه‌تا خه‌ڵكێ ده‌ڤه‌رێ نه‌كريه و كێمته‌رخه‌مى ژلايێ حكومه‌تا عيراقێ ڤه هه‌يه.
نايف سه‌يدۆ، دووپاتكر، باژارێ شنگالێ هێشتا وێرانى پێڤه دياره و نه‌هاتيه ئاڤه‌دانكرن، ئه‌ڤجا داخواز دكه‌ين سندۆقه‌كا تايبه‌ت يا ئاڤه‌دانيێ بۆ شنگالێ چ سه‌ر ب نڤيسينگه‌ها سه‌رۆك وه‌زيرێن عيراقێ يان پارێزگه‌ها نه‌ينه‌وا بت، بێته دامه‌زراندن، بڤێ چه‌ندێ دێ پتر خزمه‌ت ئێته كرن و ئاڤه‌دانى ده‌ست پێ كه‌ت.
ديار ژى كر، هێشتا خه‌ڵكێ شنگالێ ئاواره‌نه و دخوازين پتر گرنگى ب ده‌ڤه‌را شنگالێ بێته دان.
ل سالا2017ێ په‌رله‌مانێ عيراقێ برياردا كو شنگال ده‌ڤه‌ره‌كا وێرانبوويه و هێشتا وه‌كو كاڤل مايه و ده‌ست ب ئاڤه‌دانيا وێ نه‌هاتيه كرن.