ناڤهندا نووچهيان – سهما
د ڕۆژهكا وەکو ئيڕۆ دا بهريا 11 ساڵان كو ل 10ى تهباخا ساڵا 2014 پارێزگەها نەینەوا ژلایێ ڕێكخراوا داعش يا تيرۆرستى ڤه هاتە داگیرکرن و هێشتا شوونوارێن زیانێن داعش ل وى باژێرى ماینە و چارەنڤیسێ ب ههزاران کەسان يێ دیار نینە.
دڤى وارى دا، ئيڕۆ 10ـی حوزهيرانا 2025، مهحما خهليل، ئهندامێ پهرلهمانێ عيراقێ، ل بيرهوهريا كهفتنا باژێرێ مووسل دبهياننامهيهكێ دا ڕاگههاند و تێدا هاتييه؛ ژبهر ڤێ كارهساتا خوونرێژى يا ڕهش، باژێرێ مووسل باشترين كۆڕێن خۆ ژ دهستدان، ژێرخانه و جهێن شوونوارى هاتنه وێرانكرن، گهنجينهيا وێ يا ديرۆكى هاته دزين.
ههروهسا تێدا هاتيه، چارەسەرنەکرنا كهيسا ئاواران و نهقەرەبووکرنا وان، بەردەوامیا ئازارێن بێ سەروشوونان، خهمساريا حکومەتا فیدراڵ بۆ هڵدانا گۆڕێن ب کۆم و ئاسایینەکرنا ڕهوشا قەزایا شنگالێ، ڤێ چهندێ هەموويێ کارەسات بۆ ئاكنجيێن شنگالێ مهزنتر کر، کو هەست دکەن حکومەتێ نكاريه وان بپارێزت بهرى یان پشتى جینۆسایدێ، ئەڤه بخۆ ژى درێژەپێدەرا سیاسەتا جینۆسایدێ يه.
پهرلهمانتار مهحما خهليل، دبێژت: چارەسەرنەکرنا كهفتنا مووسلێ ب جدی و بەرپرسیارانە بوو ئهگهرێ هندێ كۆمكوژيهكا بكۆم دهرههقێ كێمينهيا ئۆلا ئێزديان دا بێته ئهنجامدان.
ديار ژى كر، سهربارى بهردهواميا دهردهسهرييان، هێشتا دهم مايه بۆ ڕاستڤهكرنا شاشيان، كو پێدڤيه حکومەتا عيراقێ پابەند بت بۆ بجهئينانا ڕێککەفتنا شنگالێ و بەرنامەيێ حکومی، زەمینەیەکا سەلامەت و سەقامگیری تێدا دابین بکهت کو سەروەریيا یاسايێ تێدا زاڵ بت، گرنگيێ ب کهلتوورێ ماف و لێبوردەیی و ئارامیا جڤاكى بدهت، هەروەسا دهڤهرێن وێرانكرى ب تایبەتی قەزایا شنگال و لايێ ڕۆژئاڤایێ نەینەوا ئاڤەدان بکهت، بۆ هندێ دڵنیابت ئهو کارەساته دووبارە نەبتەڤە.