ناڤه‌ندا نووچه‌يان – سه‌ما
سێ شەمبوويێ، 10ـی حوزەیرانا 2025، جه‌مال ششۆ، ئه‌ندامێ جڤاتا پارێزگه‌ها نه‌ينه‌وا بۆ سه‌ما ڕاگه‌هاند، وه‌زاره‌تا كۆچ و كۆچبه‌رێن عيراقێ هاريكاريا ئاواره‌يێن كه‌مپا هۆلێ يا خێزانێن داعشێ دكه‌ت و يێن شنگالێ پشتگوهـ هاڤێتينه.
ئه‌ندامێ جڤاتا پارێزگه‌ها نه‌ينه‌وا دبێژت: خه‌مسارييه‌كا مه‌زن ژلايێ وه‌زاره‌تا كۆچ و كۆچبه‌رێن عيراقێ ده‌رهه‌قێ ئاواره‌يێن شنگالێ ل كه‌مپاندا هه‌يه، نوكه پتر گرنگيێ ب خێزانێن تيرۆرستێن داعشێ ل كه‌مپا هۆلێ ل سووريێ دده‌ن و ب هه‌موو شێوه‌يان ئاسانكارييان بۆ ڤه‌گه‌ڕيان وان دكه‌ن.
دبێژت: ئه‌ڤه بوونه 11ساڵ هێشتا ب هه‌زاران خێزانێن ئاواره‌يێن شنگالێ ل ناڤا كه‌مپاندا ژيانا خۆ ده‌رباز دكه‌ن، چاڤه‌ڕێ بوون پتر هاريكاريا وان ژلايێ وه‌زارتا كۆچ و كۆچبه‌ران ڤه هاتبا كرن، لێ جهێ داخێ يه هاتينه پشتگوهـ هاڤێتن و چ پێنگاڤێن ڕژد بۆ ڤه‌گه‌ڕيانا وان بۆ سه‌ر مال و حالێ خۆ نه‌هاتينه كرن.
ناڤهاتى ديار ژى كر، داخواز دكه‌ين پتر پشته‌ڤانى يا ئاواره‌يێن شنگالێ ل كه‌مپان بێته كرن و جوداهى ل گه‌ڵ ئه‌واندا نه‌ئێته كرن.
نێزيكه يازده ساڵ ل سه‌ر جينۆسايدا ئێزديان ل شنگالێ ل سه‌ر ده‌ستێ ڕێكخراوا داعش يا تيرۆرستى ده‌رباز ببن، هێشتا ب هه‌زاران ئاواره‌يێن شنگالێ دناڤ و ژ ده‌رڤه‌ى كه‌مپان ل سنوورێ پارێزگه‌ها دهۆكێ دژين، چاڤه‌ڕێ نه ڕه‌وشا ده‌ڤه‌را وان ئاسايى ببت و ڤه‌گه‌ڕنه ڤه.