ناڤهندا نووچهيان – سهما
جڤاتا وەزیران دووپاتكر، كو هەرێما کوردستانێ هەموو نەرمییەك نیشاندایە ژ بۆ دەستپێكرنا هنارتنا پهترۆلێ. دبێژت: ئهم چاڤەڕێی بەغدا دكەین داكو داوییێ ب سیاسەتا نەهنارتنا موچەیی بینت.
ئيڕۆ چارشەمبوويێ 2ى تهموزا2025، جڤاتا وەزیران ب سەرپەرشتییا مەسرور بارزانی، سهرۆكێ حكومهتا ههرێما كوردستانێ جڤاتا وەزیرێن هەرێما كوردستانێ كۆمبوو و گەنگەشە ل سەر چەندین بابەتان كرییە.
تەوەرێ سەرەکی يێ کۆمبوونێ تایبەت بوو ب ئەنجامێن کۆمبوونێن ڤێ داوييێ دناڤبهرا هەر دوو شاندێن حکومەتا هەرێما کوردستانێ و حکومەتا فیدراڵ کو ل هەولێر و بەغدا، ب ئامادەبوونا نوونەرێ کۆمپانیێن پهترۆلێ هاتنه ئەنجامدان سەبارەت بۆ دەستپێکرنا هنارتنا پهترۆلا هەرێما کوردستانێ ب ڕێيا کۆمپانیا سۆمۆ و دووڤچوونا خەرجکرنا مووچهيێن هەردوو ههيڤێن پێنج و شەش يێن مووچەخۆرێن هەرێما کوردستانێ.
جڤاتا وەزیران دووپاتكر، کو هەر پابەندییەک ل سەر هەرێما کوردستانێ بوويە، ب زێدههى جێبەجێیکريە و هەرێمێ هەموو پابەندبوون و نەرمی نیشان دایە ژبۆ دەستپێکرنا دوبارە یا هنارتنا نەفتێ ب رێیا کۆمپانیا سۆمۆ دا.و گەڕاندنا داهاتێ فرۆشتنا پترۆلا هەرێمێ بۆ وەزارەتا داراییا فیدڕاڵ. نوكه هەرێما کوردستانێ و کۆمپانیێن پترۆلێ، ب هەموو شێوەیەکى ئامادەیا هاريکاریا خۆ ل گەڵ حکومەتا فیدڕال پيشاندايە بۆ هنارتنا پترۆلێ ئەو ژى ژ پێناڤی بڕینا هەمووبههانهيێن بەغدا بکارئيناين بۆ نەهنارتنا مووچەیێ موچەخۆرێن خەڵکێ کوردستانێ.
کۆمبوونێ تهكهزكر، کو نوكه هەموو لایەک، چاڤەڕێی بڕیارا حکومەتا فیدڕاڵ دکەن بۆ پەسەندکرنا وان لێکتێگەهشتنێن ههڤبهش کو ل چەند ڕۆژێن بۆرى دا، ل ناڤبهرا هەردوولايان ب ئامادەبوونا نوونەرێ کۆمپانیێن پترۆلێ هاتينه كرن، کو بۆ دەستپێکرنا هنارتنا پترۆلێ، چ بههانهيهك ل ههمبهر وەزارەتا داراییا فیدڕاڵ نهمينت بۆ خەرجنەکرنا شایستەيێن دارايی يێن هەرێمێ، ب تایبەت ژى کو هەموو بابەتێن پەیوەندیدار ب لیستا مووچەى و ژمارەیا وەزیفی و تەرازوویا پێداچوونا ههيڤانه و هوربینيا ههڤبەش يا هەردوو دیوانێن چاڤدێرییا داراییا فیدڕاڵ و هەرێمێ و ب بانکیکرنا مووچەیێ هەرێمێ و هنارتنا ڕێژەیا گەنجینەیا فیدڕاڵیی ل داهاتێ ناڤخۆیێ هەرێمێ جێبەجێکرينه و حكومەتا هەرێمێ، بەردەوامه ل سەر جێبەجێکرنا ڤان پابەندییان، لهورا دڤێت بەغدا داوييێ ب سیاسەتا نەهنارتنا مووچەیێ خەڵکێ کوردستانێ بينت کو مووچە، کو مافەکێ ئاسایی، یاسایی و دەستوورییە و ب چ ڕەنگان نابت ل ژێر چ یاسا و رێسایان ژ مافێ وان بێنە بێبەهرکرن.
پاشان د بڕگەیا دوويێ يا کۆمبوونێ دا، کوێستان محەمەد، وەزیرا کار و کاروبارێن جڤاکی، راپۆرتەک ل دۆر خانەنشینی و دەستەبەرییا جڤاکی یا کرێکارێن هەرێما کوردستانێ نیشان دا کو چەندین ئامار، زانیاری، راسپاردە و پێشنیاز بخۆڤەدگرتن. ب مەبەستا پاراستنا مافێ کرێکاران و کارمەندێن دامەزراوەيێن کەرتێ تایبەت ب ڕێيا برەودان ب سندۆقا دەستەبەرا جڤاكى و دابینکرنا مافێن خانەنشینێ بۆ کارمەندێن کەرتێ تایبەت ل هەرێما کوردستانێ و چالاککرن و ڕێکخستنا میکانیزما وەرگرتنا ڕێژەیا ههڤبەش يا خودانکاران بۆ دابینکرنا دەستەبەرا جڤاكى، تا ل داهاتى دا، بكهفته دخزمەت وان کرێکار و کارمەندێن کو شایستەیى خانەنشینی و دەستەبەرا جڤاكى دبن، بۆ هندێ مفادار بن ژ مووچەیێ خانەنشینێ و شایستهيێن دى و ئەو ئاسانکاری و خزمەتگۆزاریێن ل یاسایا خانەنشینێ و دەستەبەرا جڤاكى دا هاتين.
جڤاتا وەزیران، سهربارى دەستخۆشيێ ل وەزیرا کار و کاروبارێن جڤاکی، دانوستاندن دەربارەی پێشنیار و ڕاسپاردەيان كر و بڕیاردا لێکۆڵین و دووڤچوونا زێدهتر بكهن بۆ هندێ بڕیارا پێدڤى دوى دهربارەى دا بدهن.
