ناڤهندا نووچهيان – سهما
ئيڕۆ پێنج شهمبوويێ 14-8-2025، ڕێڤهبهرييا گشتى يا كاروبارێن ئێزديان ل وهزارهتا ئهوقافێ، سكاڵايهكا ياسايى ل دژى كهسێن بێ ڕێزى بهرامبهرى هێمايێن پيرۆزێن ئێزديان كرين ل دادگهها دهۆكێ تۆماركر.
دڤى دهربارهى دا، جهعفهر سمۆ، ڕێڤهبهرێ كاروبارێن ئێزديان ل دهۆكێ، بۆ سهما ڕاگههاند: ئيڕۆ ب شێوهيهكى فهرمى ل سهر ڕاسپاردهيێن سعود مستۆ، ڕێڤهبهرێ گشتييێ كاروبارێن ئێزديان و پشتى دووڤچوون كرى ب ڕێكا چهندين خهمخۆر و چالاكڤانێن ئێزديان دياربوويه كو چهند كهسێن ئاست نزم يێن تێكدهر ب ڕێكا سۆشيال ميديايێ بێ ڕێزيێ بهرامبهر كهسوكارێن قوربانيان و هێمايێن پيرۆزێن ئێزديان بكهن.
ڕێڤهبهرێ كاروبارێن ئێزديان گۆتژى: بهشێ ياسايى ل ڕێڤهبهرييا گشتى يا كاروبارێن ئێزديان ل وهزارهتا ئهوقافێ، سكاڵا ل دژى ئهوان كهسان تۆماركريه و ڕهوانهى دادگهها تێههڵچوونا دهۆكێ كر.
ئاشكراكر: “دوهى گهڕا ههشتێ يا 22 ڕووفاتێن قوربانييێن ئێزديان گههشتنه شنگالێ و ڕادهستى كهسوكارێن وان هاتنه كرن و دڕێورهسمهكا ژ ههژى دا ب ئاخێ هاتنه سپاردن، ل بهرامبهردا چهند كهسێن ئاست نزم گۆتنێن كرێت و نهشرين ل سوشيال ميديايێ ئاراستهى ئێزديان كرن و جڤاكێ ئێزدى دڵگرانكرينه”.
جهعفهر سمۆ دووپاتكر، ل ههرێما كوردستانێ ل گۆڕ ياسايێ و بێ جياوازى ڕێز ل ههموو پێكهاتهيان دئێته گرتن و ههر كهسهكێ گۆتارا كهرب و كينێ و بهلبهڵێ بهڵاڤ بكهت، ل گۆڕهى ياسايێ دێ سهرهدهرى ل گهڵ دا ئێته كرن.
دوهى ڕۆژا چارشهمبوويێ 13-8-2025، گەڕا هەشتێ يا ڕووفاتێن قوربانيێن ئێزدى کو ژ 22 ڕووفاتان پێكهاتبوون، پشتى ئاشکراكرنا ناسنامەيێن ئهوان و پشکنینا DNA بۆ هاتيه كرن بۆ شنگالێ هاتنه ڤهگهڕاندن و ڕێورهسمێن ب ئاخ سپاردنا وان ب ڕێڤهچوون.
ل 3ى تهباخا ساڵا 2014، ب توندترین و دڕندهترین شێوە ئێزدی کەفتنە بەر هێرش و جینۆسایدکرنێ ژلایێ تيرۆرستێن داعشێ ڤه، 6417 كهسێن ئێزدى ژلایێ تيرۆرستان ڤه هاتنه ڕهڤاندن، کو تانوكه ب هاريکاريا حکومەتا هەرێما کوردستانێ ههژمارەكا زۆر يا ڕهڤانديان هاتينه ڕزگاركرن و ئەوێن دى تانوكه بێسەروشوونن.