ناڤهندا نووچهيان – سهما
وهزارهتا كۆچ و كۆچبهرێن عێراقێ بڕيارهكا نوو ل دژى ئاوارهيێن ئێزدى ل كهمپان دايه، ڕێڤهبهرێ كۆچ و كۆچبهران ل دهۆكێ دبێژت: دێ ههموو بزاڤان كهين نهئێته بجهئينان و ئاواره ب سهرفهرازى ڤهگهرنه دهڤهرێن خۆ.
رۆژا پێنج شهمبوويێ 21ـی تهباخا 2025، پیر دهیان جهعفهر، ڕێڤهبهرێ كۆچ و كۆچبهران ل دهۆكێ، بۆ سهما گۆت: ئهڤ بڕيارا وهزارهتا كۆچ و كۆچبهرێن عێراقێ داى ل دژى ئاوارهيێن شنگالێ يه ل كهمپاندا، كو وهسا دكهت ئهو كهمپه ببنه كۆمهڵگههێن ئاكنجيبوونێ و ل جهێن خۆ بمينن و ئهڤه دێ كارتێكرنێ ل ديموگرافيا دهڤهرا شنگالێ كهت.
پیر دهیان جهعفهر ئاماژه ب وێ چهندێ دا، دڤێت ئهم ههموو بزاڤێ بكهين ئهو بڕياره نهئێته بجهئينان و خهڵكێ مه ب سهرفهرازى ڤهگهڕنه سهر دهڤهرێن خۆ و بێنه قهرهبووكرن و حكومهتا عێراقێ خزمهتگۆزاريان دابين بكهت، داكو دهست ب ژيانا خۆ يا ئاسايى بكهن.
ڕێڤهبهرێ كۆچ و كۆچبهران ل دهۆكێ گۆتژى: مه دڤێت ڕێككهفتنا ههولێر و بهغدا ل دۆر شنگالێ بێته بجهئينان و تاكه چارهسهرى يه بۆ ڕهوشا شنگالێ و دبهرژهوهندا خهڵكێ دهڤهرێ دايه.
دووپاتكر، ئهڤه چهندين جارن حكومهتا عێراقێ بڕيارێن بڤى ئاوايى نه دبهرژهوهندا خهڵكێ شنگالێ دا ددهت.
هێشتا نێزيكى 280ههزار ئاوارهيێن شنگالێ ل ناڤا كهمپاندا ل سنوورێ پارێزگهها دهۆكێ و ئيدارهيا سهربهخۆيا زاخۆ دژين، ئهو چاڤهڕێ نه حكومهتا عێراقێ ل ههمبهر ڤهگهڕيانێ ئهوان قهرهبوو بكهت و دووباره ڤهگهڕنه سهر جهـ و وارێن خۆ ڤه.