ناڤهندا نووچهيان – سهما
جەژنانا جەمایێ ئێکە ژ جەژنێن دێرینێن ئێزدیان، ڕێورهسمێن وێ بۆ ماوێ ھەفت ڕۆژان ل ناڤا گەلیێ لالشا پیرۆز ب ڕێڤە دچن، ھەر ژ ڕۆژا( ٢٤ ھەتا ٣٠ ) ئيلۆنا ڕۆژھەلاتى ، ئانکو ژ ( ٧ ھەتا ١٣) چریا ئێکێ ب ھژمارا زاینی ل پەرستگەھا پیرۆزا لالش دئێنە گێڕان.
ئێزدی ژ ھەمو دەڤەرێن ئێزدیان قەستا پەرستگەھا لالشێ دکەن ب تایبەت ژ دەرڤەی وەلاتى، ب مەرەما زیارەتبوونێ و پشکداریێ دڤێ جەژنێ دا ، دیندار و ئۆلدارێن ئۆلى وسەردەرێن خاسا دڤێتن بەری ھنگی ل لالشێ حازربن ژبۆ ئامادەکارى وپێشوازیا مێھڤانێن جەمایێ.
ژ ڕێورهسمێن جەژنا جەمایێ:
هەر هەفت ڕۆژا بەیتا هێڤاری و بەیتا جندی و بەیتا سبێ تێنە گۆتن و هەر هەفت هێڤاران سەما تێنە کێشان ئەوژی ئەڤەنە :
– سەما یا شێشمس
– سەما یا شەرفەدین
– سەما یا قانونی
– سەما یا زەرزایا
– سەما یا بلند
– سەما یا شێشمس
– سەما یا قانونی ، بەلێ بۆ زانین دوو سەما تێنە دوو بارەکرن سەمایا شێشمس و سەمایا قانونی.
– ھەموو ھێڤارا چراێن ئاقد و خاسا دئێنە ڤێخستن.
– ھەر کەسەی ئێزدی بچتە جەژنا جەمایێ دڤێتن ل نیشانێن خاسا زیارەتی بت و بچتە سەر حەودا وکانیا سپی و زمزمێ و مەزارگەھێن شێخ وپیرێن خۆ زیارەتی بت.
– ل ھەموو ھێڤارێین عیدێ سەما تێتە کێشان دگەل قەول وسەبەقا ودەف و شەبابا.
– رێورهسمێن قەنتارێ دئێنە گێڕان.
– ل ڕۆژا چارێ ژ جەژنێ پەری دئێنە سوارکرن.
– ل ڕۆژا پێنجێ ژ جەژنێ ڕێورهسمێن قەپاغێ دئێنە گێڕان.
– ل ڕۆژا شەشێ ژ جەژنێ بەرێ شباکێ دئێتە سوارکرن.
– کەسێ نەی مۆرکری بت ب ئاڤا کانیا سپی دئێتە مۆرکرن.
– ھەموو سەردەریێن خاسا سماتێ چێدکەن.
– ل ڕۆژا داويێ ژ جەژنێ تاوس دئێتە جوانکرن.
سەرەدانێت مللەتێ ئێزدی بۆ لالشا نورانی ئەرکەکی ئۆلی یە و دناڤا وی ئەرکێ ئۆلی دا رێ و رسمێن پیرۆز یێن هەین دگرێدایی جەژن و عید و هەلکەفتانە:
هەر کەسێ بێتە لالشێ ل دەسپێکێ دێ چتە پرا سەڕا تێ و سێ جاران دێ بلەز تێرا دەربازبت و دێ هەڤرازبتە هندرویی لالشێ و دێ چتە بەر غەفورێ رێیا و دێ بەرەف کانیا سپی چت و دێ تووافبت و دێ چتە کۆلانا خێرێ و دێ کەفتە سووکا مەعریفەتێ و دێ چتە بەر بەرێ هەقیێ و عەدالەتێ و دێ گەهتە دەریێ میر ئامادین و دێ تووافبت و دەربازی هندرووبت و دێ چتە بەر دەریێ قابیێ دەریێ شیخادی و زیارەتی بت و دێ زنجیرا خۆ بەتە سەری یا زیارەتبوونێ ل جەلسا شیخادی و جەلسا شێخ فەخر و دێ بەرف نیشانگەهێن شێخ و پیر و مەرەبی و ئاخرەتا خۆ چت و توواف بت و هەر نیشانەکا بگەهتێ و لێ توواف بت خێرە و سەخیەتا باوەریێ و ئیمانێ یە.
دباوەریا ئایینێ ئێزدیایێ دا هەر کەسێ بەرەف لالشا نورانی هەرت دڤێت چۆنا وی یا خێرێ بت و خۆ گونەهبار و پۆشمان نەکەت و یەفەرە ئەم بزانین هندەک دچنە لالشێ بۆ خێرێ و ل شوندا گونەهبار دبن.
کەسێ بڤێت ل خێرێ و ئیمانێ بێتە نڤیسین ئەو کەس دێ ئەرکێ ئیمانێ و بکارئینت:
– دێ بێ دەنگیێ پارێزت و هاژی خۆ و زمانێ خۆ هەبت ل لالشێ هەر تشتێ بێتە زمان دێ لسەر وی تۆماربت لەوما بێ دەنگیێ پارێزن.
– ژ ئالیێ جل و بەرگە دێ خۆ پارێزت و بێ سەر و بەر نابت دا گەزندەیێن مجێورا و خلمەتکار و کۆچەک و فەقرایێن لالشێ ژێ نێنە کرن و دوعا یان لێ بکەن.
– شەڤی بوون ل لالشا نورانی نەبت ژ سوبێ هەتا هێڤاری سەرەدان و زیارەت بوون بەسە و ب تنێ میر و جڤاتا روحانێ و خلمەتکار و مجێورێن خاس و باپچاکان دمینن و شەڤی دبن ئەوژی ژبەر رێ و رسمێن ئۆلی و دوعا و درۆزا و پێشوازیا خەلکێ و مریدێن خودانێت خۆ.
– زرنا و زەمبەرا و دیلان نەهاتینە قەبولکرنە ب هەر ئاوایەکی دبنە گونەهباری ، ب تنێ دەف و شباب هاتینە قەبول کرن و ل رۆژا بەرێ شبایکێ ڤەگەرێتە باشیک و بەحزانێ هنگی گۆڤەندا دەرێ کانیا سپی تێتە گێڕان ئەوژی دوو جارن جارا بەرێ گۆڤەندا خلمەتکارێن لالشێ یە و جارا دوویێ گۆڤەندا کابانیایە و دێ هەر کەسەک ڤەگەرێتە مالا خۆ و دێ گەهتە خێرێ و ئیمانێ.
– لالشێ جهێ عیبادەتێ و مەعریفەتێ یە و دڤێت ئیسان مەعریفەتێ بکەت و رێزێ ل هەر کەسی بگریت و بتە پالدەرێ خێرێ و تفاق و تەبایێ ب رێیا مەعریفەتێ.
– هێڤی و داخوازا ژ خودێ وان خاس و باپچاکان بکە و بۆ خودێ دەست ب سجوودێ و عیبادەت بکە ل لالشا نورانی.
ھاتنا جەژنا جەمایێ و ساخکرنا ڕێورهسمێن ھەر ھەفت ڕۆژێن جەژنا جەمایێ نیشانا ئارامی و ئێمناھیا ھەرە بەرفرهھ یا لژێر سیبەرا حکومەتا ھەرێما کوردستانێ پەیدابوويی، ژ ئاليێ دیڤە گێڕان و بەردەوامیدان ب ڤان ڕێورسمان وێ چەندێ خویا دکەت بۆ ھەموو جیھانێ کو ملڵەتێ ئێزدی ب درێژاهیا ديرۆكێ ب سەدان فەرمان ل سەر ڕابووینە وخەڵکێ ئێزدی ئێ بێ گونەھ ب ھزارەھان ھاتینە کوشتن، ڕەڤاندن و ماڵ وملکێ وان ھاتیە ژناڤبرن، لێ ئەو دوژمنێن خودان مەژیێن گەنی کو ئارمانجا وان ژناڤبرنا ملڵەتێ ئێزدی بوو ئەو ھەموو جۆرە دوژمن ژناڤچوون.