گاڤا هەموو تشت، بێ دەنگ دبیت، هۆنەر و ئەدەبیات بەرسڤێ ددن
مەروان داود
ب ئامادەبوونا ‘ سەرۆک بارزانی’ ، سەمپۆزیۆما ‘ مەلایێ جزیری ‘ ل باکورێ کوردستانێ ب رێڤەچوو، بارزانی د گۆتارا خۆ دا گەلەک مەدحێن هۆزانڤانێ کلاسیکی یێ کورد ‘ مەلایێ جزیری ‘ کرن .
ئێک ژ گۆتنێن سەرۆک بارزانی، یێن دناڤ گۆتارا وی دا بالا من کێشایی ئەڤە بوو
؛ مەلایێ جزیری ئەستێرەیەکا گەشە و هیچ دەمەکی ئاڤا نابیت، سەرقافڵەیێ عاشقێن ڕێکا حەقە، هەلبەستێن جزیری هیچ دەمەکی کەڤن نابن و هەمی جاران مرۆڤ وەسا تەخمین دکەت کو نوو گوهـ لێ دبیت. چەند ب کویری تو بچیە د ناڤ هەلبەستێن جزیری دا، هندی پتر دێ ژ جزیری نێزیک بی و سەرسام بی ب جزیری ؛
ل ڤێدەرێ دیار دبیت، سەرەرایی وێ چەندێ کو سەرۆک ‘ مەسعوود بارزانی’، هەموو تەمەنێ خۆ دناڤ سیاسەتێ دا دەبازکرییە هەر ژ چیایێن کوردستانێ هەتا سەر مێزێن دانوستاندنێ ل ناڤەندێن نێڤ دەولەتی یێن بریار دانێ، لێ هەر داخباربوونا وی ب ئەدەبیات و هۆنەرێ د ئاستەکی هەری بلند دایە .
د گۆتارە خوە چەندین پارچەیێن شعر یێن جزیری، خواندن . ئەڤ جارە ئیکێ نینە د گۆتارێن سەرۆک بارزانی، دا داخباربوونا وی ب هۆنەر و ئەدەبیاتێ دیار دبیت .
بۆ نموونە
ل دەمێ بانگەشەیا رێفراندۆما سەربەخۆیا کوردستانێ، ل سالا ٢٠١٧ چەندین جاران سەرۆک بارزانی، ب پارچەیێن شعرێن کلاسیکی یێن کوردی دەست ب گۆتارێن خوە کرییە .
هەموو سالان ژی ل سالڤەگەرا رێفراندۆمێ سەرۆک بارزانی، ب رێکا پارچەیەکا شعرێ کو دەربرین ژ ئیرادا، مللەت، کوردستان، وەلات و هتدد… وێ سالڤەگەرێ ل بیردئینیت .
ئەڤ وێ چەندێ دگەهینیت کو گەلەک هەلویستێن سیاسی و نشتیمانی یێن هەین، زمان بێ دەنگ دبیت بەرامبەر و هیچ پەیڤەک ژ هەژی نابینیت، لێ وێ گاڤا هۆنەر و ئەدەبیات بەرسڤێ ددن .