ناڤەندا نووچەیان- سەما
وەزیرێ دەرڤەیێ ئیتالیا، پەسنا “حەکیمانە”یا سەرۆک بارزانی دکەت بۆ پاراستنا سەقامگێری و ڕێگریکرن ل هندێ داکو گەلی کورد ل سووریا تووشی نەهامەتیان نەبن. هەردو لایان تەکەزی ل چارەیا ئاشتییانە بۆ قەیرانێن ل دەڤەرێ دکەن.
رۆژا چارشەمبوویێ 21ـی کانوونا دووێ 2026، سەرۆک مەسعود بارزانی، ل باژێرێ ڕۆما، ل گەل ئەنتۆنیۆ تایانی، جێگرێ سەرۆک وەزیران و وەزیرێ دەرڤەیێ ئیتالیا کۆم بوو.
د وێ کۆمبوونێ دا، ڕەوشا سیاسی و پێشهاتێن داویێ یێن دەڤەرێ و سووریێ ب گشتی و مەترسیێن سەرهەلدانەڤەیا داعشێ هاتنە گۆتوبێژکرن. تەکەز ل سەر پێتڤیا چارەسەرکرنا کێشە و ئالۆزیان ب رێکا دیالۆگ و دانوستاندنێن ئاشتیانە هاتە کرن، دور ژ توندوتیژی، شەڕ و پێکدادانان.
د پشکەکا دی یا کۆمبوونێ دا، وەزیرێ دەرڤەیێ ئیتاڵیا پەسنا رۆلێ حەکیمانە یێ سەرۆک بارزانی د پاراستنا پێکڤەژیان و سەقامگیریا عێراق و کوردستانێ دا کر، هەروەسا پێزانین بۆ بزاڤێن سەرۆک بارزانی هەبوون ژبۆ گەهشتنا ب ئاشتی و سەقامگیریێ ل سووریێ، داکو گەلێ کورد ل سووریێ تووشی نەهامەتیان نەبت.
پەیوەندیێن د ناڤبەرا هەرێما کوردستانێ و ئیتاڵیا دا تەوەرەکێ دی یێ وێ دیدارێ بوون، هەردوو ئالی هەڤڕا بوون ل سەر گرنگیدان و زێدەتر پێشڤەبرنا وان پەیوەندیان د هەموو واران دا.
هەروەسا وەزیرێ دەرڤەیێ ئیتاڵیا پشتەڤانیا وەلاتێ خۆ بۆ حکومەتا هەرێمێ و گەلێ کوردستانێ دوپات کر.