ناڤەندا نووچەیان – سەما
حازم تەحسین بەگ، میرێ ئێزدییان ل کوردستان، عێراقێ و جیهانێ پێشوازی ل شاندهكێ گرۆپێ پەرلەمانتارێن شاهنشینا ئێكگرتی (APPG) تایبەت ب داکۆکیکرن ل ئازادییا ئایینی ب سەرۆکایەتییا جیم شانۆن، ئەندامێ پەرلەمانی و بەرپرسێ گرۆپی کر.
ب گۆڕەیی ڕاگەهاندنا نڤیسینگەها جڤاتا ڕۆحانی یا بلند یا ئێزدییان، د دیدارێ دا و ب بەرهەڤبوونا د. خەلەف شنگالی، شێوەرمەندێ سەرۆکوەزیرێن عێراقێ بۆ کاروبارێن ئێزدییان، میرێ ئێزدییان بەحس ل چاوانییا خورتکرنا بهایێن لێبۆرین و پێکڤەژیانا هەڤبەش ل دەڤەرێ کر.
ئاماژە کر، میرێ ئێزدییان تیشک ئێخستە سەر چەندین پرسێن گرنگ یێن جڤاکا ئێزدییان، ژ وانا ژی کەیسا جینۆسایدێ ل سەر دەستێ ڕێکخراوا داعش یا تیرۆرستی و ئاستەنگییێن د کەڤنە هەمبەری جڤاکی و ل پێشیێ بێسەروشوونبوونا ب هەزاران ڕەڤاندییان و ئێش وئازارێن ئاوارە دنالن.
د پشکەکا دی یا دیدارێ دا، میرێ ئێزدییان داخواز کر کورسییێن کۆتایێ بۆ ئێزدییان زێدە بن کو ل گەل مافێن وان یێن ئاکنجیبوونێ ب گونجن، هەروەسا خواست یاسایەک بۆ نەهێلانا گۆتارا کەرب و کینێ بێتە دەرێخستن.
ژ لایەکێ دی ڤە، میری خواست دادگەهەکا تایبەتمەند بۆ دادگەهکرنا تیرۆرستێن داعشێ بێتە دامەزراندن و ئیدارەیەکا ناڤخۆیی کو هەموو ئالی ڕازی بن ل شنگالێ بێتە دانان، بۆ هندێ ئاوارە ڤەگەڕن و خزمەتگۆزاری بێنە دابینکرن و ئارامی بەرقەرار بت.
ل داویێ میرێ ئێزدییان داخواز ل شاندێ ناڤبری کر سەرەدانا کەمپێن ئاوارەیان بکەن و ڕەوشا مرۆڤی یا بزەحمەت یا ئاوارە تێدا دژین ببینن.