ناڤه‌ندا نووچه‌یان – سه‌ما

حکومەتا هەرێما کوردستانێ ڕەزامەندی ل سەر یه‌كسانكرنا مووچەیێ زیندانیێن سیاسی دگەل حکومەتا فیدرال نیشاندا و دۆسیێن وان بۆ بەغدا دێ هێنە ڤەگوهاستن، ڕێڤەبەرێ گشتی یێ کاروبارێن زیندانیێن سیاسی دبێژت، ب پەسەندکرنا وێ ژ لایێ بەغدا ڤە، مووچەیێن وان ژ 500 هزار دیناران دێ بنە ملیۆنەک و 200 هزار دینار.

رۆژا پێنجشەمبوویێ، 26ـی ئادارا 2026، ئەحمەد مام ڕەسووڵ، ڕێڤەبەرێ گشتی یێ خزمەتگۆزارییا کاروبارێن زیندانیێن سیاسی ل وەزارەتا کاروبارێن شەهیدان و ئەنفالکرییان ڕاگەهاند: “بۆ یه‌كسانكرنا مووچەیێ زیندانیێن سیاسی دگەل حکومەتا فیدرال ئەم ڕێککەفتبووین و بتنێ ڕەزامەندییا ئەنجوومەنێ وەزیرێن هەرێما کوردستانێ مابوو، نوکە ئەنجوومەنێ وەزیران ڕەزامەندی ل سەر ڕێککەفتنێ نیشاندایە بۆ ڤەگوهاستنا دۆسیێن زیندانییان بۆ بەغدا و هه‌ڤتاکرنا مووچەیێن وان.

ڕێڤەبەرێ گشتی یێ خزمەتگۆزارییا کاروبارێن زیندانیێن سیاسی گۆت، ل رۆژا 18ـى ئادارێ، مەسرور بارزانى، سەرۆکێ حکومەتا هەرێما کوردستانێ ب نڤیسارەکا فەرمی ب ژمارە (3045) ڕەزامەندی ل سەر ڕێککەفتنێ نیشاندایە.

د نڤیسارێ دا بڕیار هاتیە دان ب پێکهینانا لیژنەکا بلند ب سەرۆکاتییا دیوانا ئەنجومەنێ وەزیران و ئەندامیەتییا سکرتێرێ ئەنجوومەنی، وەزیرێ دارایی و ئابووری، وەزیرێ کاروبارێن شەهیدان و ئەنفالکرییان، فەرمانگەها هەماهەنگی و دویڤچوونێ و نونەراتییا حکومەتا هەرێمێ ل بەغدا.

ئارمانجا لیژنا بلند، ئێکلاکرنا دوماهیێ یا پرسا ڤەگوهاستن و هه‌ڤتاکرنا مووچەیێ زیندانیێن سیاسی و دابینکرنا بودجەیێ پێدڤی یە بۆ وان، ئەحمەد مام ڕەسووڵ گۆت ژی: جێبەجێکرنا ڤێ بڕیارێ و هه‌ڤتاکرنا مووچەیان گرێدایی هەبوونا یاسایا بودجەی ل عێراقێ و تەرخانکرنا پارەی یە ژ لایێ حکومەتا فیدرال ڤە.

بەری نوکە و ل 27ی تشرینا دووێ یا 2025ێ، ڕێڤەبەرایەتییا کاروبارێن زیندانیێن سیاسی یێن هەرێما کوردستانێ ڕێککەفتن دگەل دەزگەهێ زیندانیێن سیاسی یێن عێراقێ کربوو، نوکە مووچەیێ زیندانیێن سیاسی ل هەرێما کوردستانێ 500 هزار دینارن، بەلێ وەک ڕێڤەبەرێ گشتی دبێژیت: ئەگەر ڕێککەفتن بهێتە جێبەجێکرن، مووچە دێ بتە ملیۆنەک و 200 هزار دینار و هەموو مافێن زیندانیێن سیاسی یێن عێراقێ، دێ زیندانێن هەرێمێ ژی ڤەگرن.”

ل دویڤ ئامارێن فەرمی، هەتا نوکە 25 هزار و 618 زیندانیێن سیاسی ل هەرێما کوردستانێ هاتینە پشتڕاستکرن. ژ وی ژمارەیێ ژی:

• 5,216 کەس نوکە مفادارن ژ مووچەی.

• 17 هزار دۆسیێن دی هاتینە ئامادەکرن، بەلێ هێشتا ووردبینی بۆ نە هاتیە کرن.