ناڤهندا نووچهیان – سهما
ژ پێخهمهت ب هێزكرنا گیانێ پێکڤەژیانێ و ب ههلكهفتا نێزیكبوونا جهژنا رهمهزانێ، ڕۆژا سێشهمبوویێ، 17ـی ئادارا 2026ـێ، ل هۆلا “میدیا” ل ناحیا فایدێ، پرۆسهیا دابهشكرنا هاریكاریێن دارایی ب سهر 150 خێزان و قوتابیێن موسلمان یێن كێم دەرامەت دا هاته ئهنجامدان.
ئەڤ دەستپێشخەرییە ل ژێر چاڤدێرییا لقی ئێکێ پارتی دیموکراتی کوردستان و د چارچۆڤێ پرۆژێ “بهارا خێر و دلۆڤانیێ 3” دا هاتە بجهئینان، هاریكاری ژ لایێ گهنجهكێ خێرخوازێ ئێزدی یێ ئاكنجیێ دەرڤەی وەڵاتی ب ناڤێ “دلمان حاکم نمر” هاتبوونە تەرخانکرن، کو ب هەماهەنگی دگەل بنگەهێ لالش ـ تایێ شاریا، لێژنا ناوچا فەیدیێ، و رێڤەبەرییا باژێرڤانیێن فایدێ و خانکێ بڕێڤە چوو.
ل سهر ڤی بابهتی، دلگهش سهلیم بهرپرسێ بنگههێ لالش تایێ شاریا، د پهیڤهكێ دا بۆ كهنالێ سهما دهستخۆشی ل خێرخواز “دلمان حاکم” كر و راگههاند كو ئەڤ کارە نموونەیەکا بلند و جوان یا پێکڤەژیانا ئایینی یە ل کوردستانێ.
ناڤهاتی ئاماژهكر، ئارمانج ژ ڤان كاران ب هێزكرنا تهبا و برایینیێ یه د ناڤبهرا ههموو پێكهاتهیان دا و دیار كر كو ڤی خێرخوازی بهری نوكه ژی د جهژنێن ئێزدییان دا ب كوژمێ 40 ملیۆن دیناران هاریكاری گههاندینه ههژاران.
د ڤێ چالاكیێ دا، كو ب ئامادهبوونا عادل ئەمین رێڤەبەرێ ناحیا فەیدیێ، زەردەشت شێخ شامو رێڤەبەرێ ناحیا خانکێ، و هژمارهكا مامۆستایێن ئایینی یێن موسلمان و ئێزدی بڕێڤە چوو، بۆ هەر خێزانەکێ کۆژمێ 100 هزار دینارێن عیراقی وەک دیاریا جەژنێ هاتە پێشكێشكرن.
ئامادهبوویان دوپات كر كو ئهڤ جۆره ههلویسته پێكڤهژیانا دهڤهرێ دیار دكهت، ب تایبهت ئاینێ ئێزدی كو ههردهم ل سهر بنهمایێ حهژێكرنا مرۆڤایهتیێ و هاریكارییا ههژاران كار دكهت بێی جوداهی د ناڤبهرا چ ئاین و مهزههبان دا.
