سهما – خەوشابا
گوندێ خەوشابا، کو ئێکە ژ گوندێن کەڤنارێن ئێزدیان، ب دەهان سالانە د ناڤ ئاریشەیێن کێمییا خزمەتگوزارییان دا دژیت، وەڵاتییێن ڤی گوندی نالینێ ژ نەبوونا ئاڤ، کارەب و جادهیان دکەن و دبێژن کو ئەو کەفتینە د ناڤبەرا بەرپرسایەتییا هەردوو حکوومەتان دا و کەس ئاڤڕیێ لێ نادەت.
وەڵاتییێن گوندی ئاماژێ ب هندێ دکەن کو ژ کۆما 24 دەمژمێرێن شەڤ و رۆژێ، زێدەتر ژ دوو دەمژمێران کارەب ب دەست وان ناکەڤیت. ئەمین عەلی، وەڵاتییەکێ گوندی یە، ل دۆر ڤێ چەندێ بۆ كهنالێ سهما و پهیامنێرێ وێ سهفیان سلۆ دبێژت: گوندێ مە یێ بەهدلی، ئاڤا مە ب کارەبێ ڤە گرێدایە، ئەگەر کارەب نەبت ئاڤ ژی نینە، زۆربەی جاران ژبەر ئامیرێن ژ كاركهفتی ئەم ب تەمامی بێ کارەب دمینین و ژیانا مە گەلەک ب زەحمەت کەفتییە.
ل وەرزێ زڤستانێ، ئاریشەیێن خەوشابا مەزنتر دبن، ب ئەگەرێ بارانێ و نەبوونا جاددەیێن قیرکری، رێکێن گوندی دبنە هەری و هاتووچۆ لێ دهێتە بڕین، فەهیم موراد، وەڵاتییەکێ دی یێ گوندی یە، دیار دکەت کو پتر ژ 400 مالان ل گوندی دژین و دبێژیت:”ئەم سبێ ب ب ترۆمبێلێن بارههلگر دهێین و دچین و داخوازا مە ئەوە دەنگێ مە بگەهتە جهێن پەیوەندیدار، چونکو گەلەک کەناڵ دهێن و وێنەیان دگرن، بەلێ چ گۆهۆڕین د رەوشا مە دا پەیدا نابن.”
خەلکێ خەوشابا ب بێ ئۆمێدی بەحسێ وێ چەندێ دکەن کو وان هەست ب “پشتگوهـ هاڤێتنێ” کرییه ژ ئالیێ حكومهتا مووسل ڤه وەک هندەک ژ وان دبێژن، وەک قوربانی ماینە و ژیانا وان گەهشتییە ئاستەکێ وەسا کو هندەک خێزان نەچار بووینە گوندی بجهـ بهێلن.