ناڤەندا نووچەیان – سەما
ئیرۆ شهمبوویێ ل رێكهفتی ١٤ی ئادارا ٢٠٢٦ێ، ب مەرەما زێدەکرنا ڕووبەرێ کەسکاتیێ و پاراستنا ژینگەیێ ل قەزا شێخان، هەوەکا بەرفەرهـ یا دارچاندنێ ل سەنتەرێ قەزایێ بڕێڤە چۆ، ئەڤ چالاکییە وەک وەفایەک بۆ ١٢٣ سالیا ژدایکبوونا بارزانیێ نەمر و ب هەلکەفتا بیرەوەریێن نەتەوەیی یێن مەها ئادارێ هاتە رێکخستن.
ئەڤ هەوا ژینگەهی سهرۆكاتیا باژێرڤانییا شێخان ب هەماهەنگی د گهل بنگههێ لالش تایێ شێخان و نڤیسینگهها لالش یا مهههتی و لقا شێخان یا ئێکەتیا قوتابی و لاوێن دیموکراتا کوردستانێ و بەشێ رێکخراوێن جەماوەری و پیشەیی یێ لقێ ٢٠ یێ پارتی هاتە ئەنجامدان، د ڤێ چوارچۆڤێ دا، ب ئامادەبوونا رێزدار (هەڤال ساڵح نەرمۆ) کارگێرێ لقێ ٢٠ و بەرپرسێ بەشێ رێکخراوان، دگەل هەڤالێن کارگێریا لقێ و (ئیسماعیل فرست) بەرپرسێ لقا شێخان یا ئێکەتیا قوتابی و لاوان، و هەروەسا کومەکا کادیر و فەرمانبەرێن دامودەزگەهێن حزبی و حکومی، ئهڤ ههوه ئهنجام دا.
د دیدارەکا تایبەت دا بۆ کەناڵێ سەما، “خالد نەرمۆ” سەرۆکێ باژێڕڤانییا قەزا شێخان ڕاگەهاند: “ئەڤ هەوە وەک نەریتەکێ ساڵانە و ب مەرەما زێدەکرنا کەسکاتیێ ل سەنتەر و دەوروبەرێن قەزایێ هاته ئەنجامدان.
” ناڤبری ئاماژە ب وێ چەندێ ژی کر کو ئارمانجا سەرەکی جوانکرنا سیمایێ باژێری و پاراستنا ههڤسەنگییا ژینگەهێ یە، کو ئەڤە ژی د چوارچۆڤێ ڕێنمایێن حکومەتا هەرێما کوردستانێ دایە بۆ گرنگیدان ب کەرتێ ژینگههێ ل سەرانسەری هەرێمێ.
گۆتژی، جێیێ ئاماژێ یە کو قەزا شێخان ساڵانە د مەها ئادارێ دا چەندین چالاکییێن جودا یێن چاندنێ و ژینگەهێ ئەنجام ددەت، داکو سیمایەکێ گەشتوگوزاری و ساخلهم بدەتە دەڤەرێ.
