ناڤهندا نووچهیان – سهما
ئیرانێ پێشنیاز کرییە کو یارییێن وێ د مۆندیالا 2026ێ دا ژ وەلایەتێن یەکگرتی یێن ئەمریکا بۆ مەکسیکێ بهێنە ڤەگوهاستن، ئەڤە ژی ژبەر وی شەڕێ نوکە ل رۆژهەلاتا ناڤین د ناڤبەرا ئەمریکا – ئیسرائیل و ئیرانێ دا بەردەوامە.
ئەحمەد دونیمالی، وەزیرێ وەرزشێ یێ ئیرانێ، د لێدوانەکێ دا کو ئاژانسا نووچەیان یا کۆمارا ئیسلامی یا ئیرانێ (ئێرنا) بەلاڤکرییە، دیار کر کو رەنگە ئەڤێ پێشنیازێ دگەل فیدراسیۆنا نێودەولەتی یا تەپاپێ (فیفا) گەنگەشە بکەن.
دونیمالی گۆت: “هێڤیدارم بارودۆخ ب ئاوایەکی بت کو ل دویماهیێ کورێن مە بكارن پشکداریێ د مۆندیالێ دا بکەن.”
هەروەسا زێدە کر: “گرنگە هەموو ئالیێن وەرزشی ب هووری بهێنە بکارئینان بۆ پشتراستبوونا بەردەوامیا ئەگەرێ پشکداریکرنێ، پەیوەندی ب فیفا ژی هاتییە کرن دا کو رایێ وان ل سەر ڤی بابەتی وەرگرین.”
بڕیارە هەلبژارتیێ ئیرانێ د قۆناغا کۆمان یا مۆندیالێ دا بەرامبەر هەلبژارتیێن بەلجیکا، نیوزلەندا و مسرێ یاریێ بکەت، کو بڕیارە هەر سێ یاری ل وەلایەتێن یەکگرتی یێن ئەمریکا بهێنە ئەنجامدان، ئەمریکا ب هەڤپشکی دگەل مەکسیک و کەنەدا مێهڤانداریا ڤێ قارەمانیێ دکەت د ناڤبەرا 11ی حوزەیرانێ تا 19ی تەمموزا 2026ێ.
ئەڤە د دەمەکێ دایە کو دونیمالی، رۆژا چارشەمبیا دەربازبووی، ئەگەرێ پشکداریکرنا ئیرانێ د مۆندیالێ دا دوورخستبوو.
ژ لایەکێ دی ڤە، دۆنالد ترەمپ، سەرۆکێ ئەمریکا، رۆژا پاشتر راگەهاند کو ژبەر ئەگەرێن ئەمنی نەیا گونجایە ئیران پشکداری مۆندیالێ بت، لێ ئیرانێ ئەو ئاخفتن رەت کرن و تهكهزی ل سەر وێ چەندێ کر کو بڕیار بتنێ ژ لایێ فیفا ڤە دهێنە دان.