ناڤهندا نووچهیان – سهما
ل کەمپا “کەبەرتوو” یا ئاوارەیێن شنگالێ، جەژنا رەمەزانا ئەڤسالە رەنگەکێ جودا یێ پێکڤەژیانێ نیشان ددەت. سەرەڕای دەربازبوونا ١١ سالان ل سەر ئاوارەیی و ژیان د بن چادران دا، لێ هەماهەنگی و برایەتیا د ناڤبەرا پێکهاتەیێن موسلمان و ئێزیدی دا وەک خەلکێ شنگالێ، بوویە نموونەیەکا بەرچاڤ.
ل ناڤ جەرگێ کەمپێ و دیوانا پێكڤهژیانێ ههیه کو دیوانەکا بەرفرههـ و نیشتیمانییە، ژمارەیەکا زۆر یا ئاکنجیێن کەمپێ کۆمبووینە، ل سەقایەکێ بارانی دا، ئێزیدی د ناڤ ڤێ دیوانێ دا جەژنا رەمەزانێ ل برایێن خۆ یێن موسلمان پیرۆز دکەن.
مام حسێن، ب نونەراتیا ئاوارەیێن موسلمانێن كهمپێ بۆ د لێدوانهكێ دا بۆ كهنالێ سهما ئاخفت، دیار کر کو جەژنا وان ب پشکداریا برایێن وان یێن ئێزیدی تەمام دبت.
وی گۆت: “باوەر بکە برایێن مە یێن ئێزیدی ژ مە پتر ل هیڤیا جەژنێ دبن دا کو بێنە ل جهم مه و جەژنێ ل هەڤ پیرۆز بکەین، ئەم ١١ سالە ل ملێ ئێک دژین، کین و غەدرێ ژ خۆ دویر دکەین و کێشێن خۆ پێکڤە چارەسەر دکەین.”
ژ لایێ خۆ ڤە، خدیدا كرتوو وەک نونەرەکێ پێکهاتەیا ئێزدی ل کەمپێ، وێ چەندێ دوپات دکەت کو پێکڤەژیان ل دەڤ وان بوویە کەلتوور.
وی ئاماژە دا کو: “ئەم و برایێن مە یێن موسلمان د خۆشی و ناخۆشیان دا دگەل ئێک بن، ئیرۆ هاتینە ڤێدهر دا بێژین جەژنا وە پیرۆز بت و ئەم هەموو ب سەربلندی ڤەگەڕینە سەر جهـ و وارێن خۆ ل شنگالێ.”
گۆتژی، خەلکێ شنگالێ سەرەڕای نەخۆشیێن ئاوارەییێ، چ جاران رەسم و نەریتێن خۆ یێن پێکڤەژیانێ ژ دەست نەداینە، دیوانا کەمپا کەبەرتوو بوویە جهێ هەلوەشاندنا جوداهیان و نووکرنا پەیمانا برایەتیێ د ناڤبەرا پێکهاتەیێن دەڤەرێ دا.