ناڤەندا نووچەیان – سەما
سەرۆک بارزانی د پەیامەکێ دا ب هەلکەفتا جەژنا نەورۆزێ و سەرێ سالا 2726ـی یا کوردی، داخوازێ ل لایەنێن سیاسی یێن کوردستانێ دکەت ل سایا ئەوان گرژی و ئالۆزیێن دەڤەر گرتی ئێکرێز و هەماهەنگ بن، ئەڤە ژی ژ پێناڤی پاراستنا ئارامی و بەرژەوەندییێن وەلاتی.
دەقێ پەیاما سەرۆک بارزانی ب هەلكەفتا جەژنا نەورۆزێ
ب ناڤێ خودایێ مەزن و دلۆڤان
ب هەلكەفتا جەژنا نەورۆزێ و سەری ساڵا 2726ێ کوردی، پیرۆزباهییێ ل مالباتیێن سەربەرزێن شەهیدان و پێشمەرگەیێن قارەمان و هەمی كوردستانیێن خۆشتەڤی ل ناڤخۆ و دەرڤەی وڵاتی دكەم. هەروەسا جەژنا نەورۆزێ ل هەموو وان گەلێن جیهانێ و دەڤەرێ پیرۆز دكەم یێن کو نەورۆز پشكەک بیت ژ فەرهەنگ و مێژوویا وان. هیڤیدارم سالەکا پڕ ژ خۆشی و بەختەوەری بیت بۆ هەموو لایەکی.
نەورۆز بۆ گەلێ كوردستانێ هەمی دەما مژدەیا دەسپێكەکا نوو و ئومێدەکا تازە و سەركەفتنێ ب سەر ستەمكار و سەختییان دا بوویە. ئەڤە وەك فەرهەنگەکا دەولەمەندا بەردەوامبوون و تێكۆشانێ بۆ گەهشتن ب ئازادی و ئاشتیێ، د مێژوویا گەلێ كوردستانێ دا ڕەگێن كویر داکوتاینە.
نەورۆزا ئەڤسالە هەڤدەمە دگەل گۆڕانكاری و ئاڵۆزی و گرژییێن زۆر ل دەڤەرا مە و جیهانێ ب گشتی. د ڤی بارودۆخێ هەستیار و مێژوویی دا، پێدڤیە پتر ژ هەر دەمەکی لایەنێن سیاسی هەماهەنگ و هاریكارێن ئێك بن و پشتەڤانێن بەرژەوەندی و ئارامی و ئاساییشا وەلاتێ مە بن.
هیڤیدارم نەورۆزا ئەڤسالە ببتە دەسپێكەک بۆ تەبایی و برایەتییا پتر د ناڤبەرا لایەنێن سیاسی دا، و خەلكێ خۆشتەڤی یێ كوردستانێ ئەڤێ نەورۆزێ و هەمی جەژنێن دی ب شادی و كەیفخۆشی ببورینن. ئومێدەوارم گەلێن دەڤەرێ دوور ژ شەڕ و گرژی و ئاڵۆزییان بکارن د ئاشتی و ئارامیێ دا بژین.
نەورۆزا وە پیرۆز بت و هەر ب خێر و خۆشی بمینن.
مەسعود بارزانی
29ی ڕەشەممێ ٢٧٢٥ی كوردی
20ی ئادارا 2026ێ زایینی