ناڤهندا نووچهیان – سهما
فەرمانگەها پەیوەندیێن دەرڤە یا حکومەتا هەرێما کوردستانێ، ب توندی سەرکۆنەیا وان هێرشێن درۆنی کر یێن کو شەڤا دەربازبووی بۆ سەر هەولێرا پایتەخت هاتینە ئەنجامدان، ب تایبەت ئەو هێرشا کو کونسوڵخانەیا گشتی یا وەلاتێ ئیمارات کربوویە ئارمانج.
د دەمەکی دا کو ئاسمانێ هەولێرێ ڕووبڕووی پێلهكا چڕ یا هێرشێن درۆنی ببوو، فەرمانگەها پەیوەندیێن دەرڤە ئەڤ هێرشە ب کارەکێ “نەڕەوا” و “پێشێلکرنەکا ئاشکرا یا یاسایێن نێودەوڵەتی” بناڤکر، و د ڕاگەهاندنێ دا هاتییە تهكهزكرن کو هەرێما کوردستانێ ئالیگرا ئاشتیێ یە و نابته پشکەک ژ چو شەڕ و ململانێیان.
فەرمانگەها پەیوەندیێن دەرڤە داخواز ژ حکومەتا فیدراڵ یا عێراقێ کر کو بەرپرسیارەتیا خوە د پاراستنا سەروەریا وەڵاتی دا هەلگرت، هەروەسا داخواز کر کو ڕێگری ل وان “گرووپێن توندڕەو و ژ یاسایێ دەرکەفتی” بهێتە کرن یێن کو بێی چو ئەگەر هەرێما کوردستانێ و نێردەیێن بیانی بۆردۆمان دکەن.
ل دووف زانیارییان، شەڤا دەربازبووی ب گشتی پێنج درۆنێن بۆمبڕێژکری بەرەف هەولێرێ هاتبوونە ئاراستەکرن، هەموو هێرش ژ ئالیێ سیستەمێ بەرگریا هەڤپەیمانان ڤە هاتنە پوچەڵکرن، لێ پاشمایێن ئێک ژ وان درۆنێن تێکشکاندی ل نێزیک کونسوڵخانەیا ئیمارات کەفتنە خوارێ، خۆشبەختانە چو زیانێن گیانی ژ ئەنجامێ ڤێ روودانێ نەبووینە.