ناڤەندا نووچەیان – سەما
رێكخراوا بەتریكۆر بۆ مافێن مرۆڤى ل شنگالێ، د نووترین ڕاپۆرتا خۆ دا ل دۆر كهيسا گۆڕێن بكۆم ل قەزا شنگالێ، دوپاتى ل سەر مافێ ڕەوایێ قوربانییان و كەسوكارێن وان دكەت بۆ گەهشتن ب ڕاستیيێ و دادپەروەریيێ.
ل گۆڕەيى ئامارێن ڕێكخراوێ، هەتا نۆكە (857) ڕووفات ژ گۆڕێن بكۆم يێن قوربانييێن ئێزدييان ل دهڤهرێن جواديێن شنگالێ هاتینە دەرێخستن، لێ ژ ڤێ ژمارەیێ تنێ (296) ڕووفات هاتینە ناسین و ڕادەستى كەسوكارێن وان كرینە. ئەڤە د دەمەكى دایە كو هێشتا (561) ڕووفاتێن دی ل فەرمانگهها نۆژداریا داد ل بهغدا ماینە و چاڤەڕێى پشكنینا DNA و دیاركرنا ناسنامەیێن خۆ دكەن، كو هندەك ژ وان ل سالا 2019ێ ڤە هاتینە ڤەگوهاستن و هەتا نۆكە كارێ وان ب داوی نەهاتییە.
پەتریكۆر ئاماژێ ب وێ یەكێ دكەت كو پاشئێخستنا ڤى كهيسى بۆ چەندین سالان، بارێ خێزانێن قوربانییان گرانتر لێ دكەت. ئەو خێزانێن كو ب سالانە د ناڤ بێ ئۆمێدیيێ دا چاڤەڕێى چارەنڤیسێ كەسوكارێن خۆ دكەن، دا كو ب شێوەیەكى شكۆدار و ل گەل كەرامەتا مرۆڤایەتیيێ ڕووفاتێن وان وەربگرن و ڤهشێرن.
رێكخراوا پەتریكۆر یا مافێن مرۆڤى دوپاتكر، ئاشكراكرنا چارەنڤیسێ قوربانییان، و ب زووترین دەم ئەنجامدانا ڕێكارێن پشكنین و ناسینا ناسنامەیان، و ڕادەستكرنا ڕووفاتان بۆ كەسوكارێن وان، ئەركەكێ مرۆڤى و یاسایی یە و چ پاشئێخستنێن دیتر قەبوول ناكەت.
ل 3ێ تهباخا 2014ێ، ڕێكخراوا داعش يا تيرۆرستى ئێرش كرە سەر شنگالێ و ژ ههزار كهسێن ئێزدى هاتنە كوشتن، هەروەسا شەش ههزار و 417 ژن و زارۆك و زهلام ڕەڤاندن، و ب ئەگەرێ شەڕى ژى 80% ژ سەنتەرێ قەزایێ و گوندێن شنگالێ هاتنە وێرانكرن.
رێكخراوا داعش يا تيرۆرستى ب سهدان وهلاتييێن بێ گونههـ يێن ئێزدى د گۆڕين بكۆم دا گولـلهبارانكرن و هێشتا ڕووفاتێن ب سهدان قوربانييان نههاتينه دهرێخستن.