ناڤەندا نووچەیان – سەما
سەرپەرشتیارێ ئیدارەیا سەربەخۆیا زاخۆ راگەهاند، زێدەتر ژ 10 ههزار پارچەیێن ئەردی بۆ بەلاڤکرنێ ب سەر فەرمانبەران دا هاتینە بەرهەڤکرن و ل دەسپێکا هەفتیا بێت دێ پڕۆسەیا تیروپشکێ بۆ وەرگرتنا ئەردی دەست پێ کەت.
ئيرۆ ڕۆژا ئێک شەمبوويێ، 03ی ئهیارا 2026، گوهدار شێخۆ، سەرپەرشتیارێ ئیدارەیا سەربەخۆیا زاخۆ د کۆنفرانسەکێ ڕۆژنامەڤانیدا ڕاگەهاند، زێدەتر ژ پێنج ههزار پارچەیێن ئەردی د قۆناغێن چۆی دا هاتینە دابهشکرن و د ڤێ قۆناغێ ژی دا ئەو فەرمانبەرێن هەشت سالێن خزمەتێ هەین، دێ ئەرد پێ ئێتە دان.
گۆتژی، ئەڤ پڕۆسە دێ ب ئاشکەرایی و شەفافانە و ڤاڤارتن ل باژێرڤانییا زاخۆ ئێنە ڕاگەهاندن و دابەش کرن.
سەرپەرشتیارێ ئیدارەیا سەربەخۆیا زاخۆ ئاماژە ب وێ یەکێ کر، باژێرڤانييێن زاخۆ ناڤێن زێدەتر ژ 13 ههزار فەرمانبەران ڕەوانەکرینە و پشتی ووردبینیکرنێ، زێدەتر ژ 10 ههزار پارچەیێن ئەردی بۆ بەلاڤکرنێ هاتینە بەرهەڤکرن. و ڕۆنکر ژى، ئەگەر هەر فەرمانبەرەکى بەری نۆکە مفادار بت، مافێ وەرگرتنا ئەردی نامینت.
گوهدار شێخۆ ئەو یەکە ژی دیار کر، پڕۆسەیا تیروپشکێ بۆ وەرگرتنا ئەردی ل دەسپێکا هەفتیا بێت دێ دەست پێ کەت و ل دووڤ ڕێڤەبەرییان دێ ئێتە رێکخستن، بۆ قۆناغا ئێکێ ژی دێ ژ فەرمانبەرێن چاندنێ دەست پێ کەن. پڕۆسە دێ نێزیکی چار تا شەش هەیڤان ڤهکێشت، بەلێ پشتراستیيێ ددەت کو چو فەرمانبەرێن شایستە بێ ئەرد نامینن.
ئەڤ پێنگاڤا ئیدارەیا سەربەخۆیا زاخۆ د چارچۆڤێ بڕیارەکا بەری نۆکە یا جڤاتا وەزیرێن هەرێما کوردستانێ دا دئێت بۆ پێدانا ئەردی ب وان فەرمانبەرێن زێدەتر ژ هەشت سالێن خزمەتێ هەین و بەری نۆکە ژ وەرگرتنا ئەردی یان یەکەیێن ئاکنجیبوونێ مفادار نەبووین.