ناڤەندا نووچەیان – سەما
میر حازم تەحسین بەگ، میرێ ئێزدییان هیڤیخوازە جەژنا حەجییا( قوربانێ) ببتە دەرفەتەک بۆ بهێزکرنا براتی و ڤیانێ و پێکڤەژیانا سەرجەم مرۆڤاتییێ.
ئیرۆ دووشەمیێ 25یی ئەیارا 2026، میر حازم تەحسین بەگ، میرێ ئێزدییان ل کوردستان، عێراقێ و جیهانێ و سەرۆکێ جڤاتا ڕۆحانی یا بلند یا ئێزدییان پەیامەکا پیرۆزباهییێ ب هەلکەفتا هاتنا جەژنا حەجییا بەلاڤ کر.
د پشکەکا پەیاما میرێ ئێزدییان دا هاتییە، هیڤیخوازین جەژنا خێر و خۆشی و ئێکگرتن و نەهێلانا کەرب و کینێ بت.
دەقێ پەیاما میرێ ئێزدییان ب هەلکەفتا جەژنا حەجییا:
گەرمترین و جوانترین پیرۆزباهییان پێشکێشی هەموو موسلمانان ل عێراقێ و جیهانێ و ئەوان کەسێن ڤێ جەژنا پیرۆز (حەجییا – قوربانێ) دگێڕن.
ئەڤ جەژنە یا پێخەمبەر ئیبراهیمی یە (سلاڤ لێ بن) (بابێ پێخەمبەران)، و هەموو ئۆلێن ئیبراهیمی تێدا پشکدارن.
ئۆلا ئێزدی ژی جەژنا (حەجییا _ قوربانێ) دگێڕن، ئەوا کو هێمایە بۆ ڕۆژا قوربانیدانا ئیبراهیم خەلیل ب کوڕێ خۆ ئیسماعیلی وەک نەدر یان قوربانییەک بۆ خودایێ مەزن.
هیڤیدارین جەژنا خێر، خۆشی، ئێکگرتن و ئێکدوقەبوولکرنا مرۆڤان و نەهێلانا گۆتارا کەرب و کینێ ب هەموو ڕەنگان کار بۆ ئاڤاکرنا پرێن حەزژێکرنێ و پهیوهندییان دگەل ئێک و دانپێدان ب ئێکودوو و هەڤپشکەک د وەلاتی و مرۆڤاتییێ دا.