ناڤەندا نووچەیان – سەما
وەزارەتا پەروەردەیێ یا حکومەتا هەرێما کوردستانێ دبێژت، هەموو بەرهەڤی بۆ ب ڕێڤەچۆنا ئەزموونێن پۆلا 12ێ هاتینە کرن و ل دەمێ خۆ یێ دیارکری دا دێ ئێنە کرن.
وەزارەتا پەروەردێ چەند بڕیار و ڕێنمایێن تایبەت بۆ ب ڕێڤەچۆنا ئەزموونان دەرکرن.کو لدووڤ فەرمانەکا وەزاری کو ئالان حەمە سەعید، وەزیرێ پەروەردێ ئیمزا ل سەر کرییە و ئیرۆ هاتیە بەلاڤ کرن.
وەزارەتا پەروەردێ دبێژت: پێدڤییه چاڤدێرێن هۆلێن ئەزموونان سهقایهكێ گونجای و ئارام بۆ قوتابییان دابین بکەن و نابت سەرپەرشت، هاریكار و چاڤدێر مۆبایلان ببەنە د ناڤ هۆلێن ئەزمووناندا، ژبلی وێ مۆبایلا تایبەت یا بۆ رێڤەبەرێ هۆلێ هاتییە دەستنیشان کرن.
هەروەسا پێدڤییە سهرپهرشتێن هۆلێ پشتڕاست بن ژ لاپهرێ سۆمایێ یێ هەر قوتابییەکی كو ناڤێ وی ل سەر بت، ئەگەر قوتابی لاپهرێ پرسیاران یان سۆمایێ دگەل خۆ نەزڤڕینیت، نمرهیا وی دێ بیته سفر.
هەر د ڕێنمایان دا هاتییە، بهری ئهزموونان پشکنین بۆ هەموو قوتابییان دێ ئێنەکرن، برنا هەر ئامیرەکێ ئەلکترۆنی قەدەغەیە.
وەزارەتا پەروەردێ دیار ژی کر، لژنەیێن ئەزموونان مافێ وێ چەندێ نینە وێنەیان بۆ پرسیاران بگرن و ل سۆشیال میدیایێ بەلاڤ بکەن. لژنەیا بلند یا ئەزموونان ڕۆژانە دێ بەرسڤان دەستنیشان کەن و بەلاڤ کەن.
ئاماژە ب وێ چەندێ دا، پێدڤی ناکەت ڕوومالا میدیایی بۆ هۆلێن ئەزموونان بێنەکرن.
بڕیارە ئەزموونێن پۆلا 12ێ ل 14ی حوزەیرانا 2026 دەست پێ بکەن و هەتا 8ی تەممووزێ بەردەوام بن.