ناڤهندا نووچهيان – سهما
مەسرور بارزانی، سەرۆکێ حکومەتا هەرێما کوردستانێ ل گەل تۆم باراک هنارتييێ تایبەت یێ سەرۆکێ ئەمریکا بۆ عێراقێ و سووریایێ دوپاتى ل سەر گرنگیيا کاراکرنا پەرلەمانێ کوردستانێ، پێکئینانا کابینەیا نوو یا حکومەتا هەرێمێ و ب داوی ئینانا چەقبەستویيا سیاسی د نێزیکترین دەم دا کر.
ئيرۆ سێ شەمبێ، 16ـى حوزەیرانا 2026، مەسرور بارزانی، سەرۆکێ حکومەتا هەرێما کوردستانێ پێشوازی ل شاندەکێ ئەمریکی ب سەرۆکاتیيا بالیۆز تۆم باراک هنارتييێ تایبەت یێ سەرۆکێ ئەمریکا بۆ عێراقێ و سووریێ و باڵیۆزێ ئەمریکا ل تورکیا کر.
د کۆمبوونێ دا، کو جۆشوا هاریس هەلسووڕێنەرێ کاروبارێن بالیۆزخانهيا ئەمریکا ل بەغدا و جەنەرال کێڤن لامبێرت فەرماندەیێ گشتی یێ هێزێن هەڤپەیمانان ل عێراقێ و سووریێ بهرههڤ ببوون، ڕەوشا گشتی یا هەرێما کوردستانێ، عێراق و دەڤەرێ هاتە بهحس كرن.
سەرۆکێ حکومەتێ سوپاسى و پێزانينێن هەرێما کوردستانێ بۆ هاریکاری و پشتەڤانیيا بەردەوام یا وهلاتێن ئێكگرتیيێن ئەمریکا دوپاتکر و تهكهزى ل سەر گرنگیيا ب هێزکرنا پەیوەندیيێن دوولایەنە د بوارێن جودا کر.
بالیۆز تۆم باراک، سهرهراى پهسنا کاروانێ پێشکەفتن و ئاڤەدانیيێ ل هەرێما کوردستانێ، ئاماژە ب وێ چەندێ کر کو سەرۆک ترەمپى ڕێزەکا تایبەت بۆ گەلێ کورد، هەرێما کوردستانێ و سەرکرداتیيا سەرۆک مەسعود بارزانی هەیە.
هەردو ئالى ب ههڤڕابوون ل سەر گرنگیيا پێشڤەبرنا بتر یا پەیوەندیيێن بازرگانی د ناڤبەرا ئەمریکا، عێراق و هەرێما کوردستانێ دا و پشکداریيا زێدەتر یا کۆمپانیێن ئەمریکا ل عێراقێ و هەرێمێ ب تایبەت د بياڤێ وزەیێ دا.
هەروەسا هەردو ئالييان تهكهزى ل سەر پێدڤیيا پشتەڤانیکرنا حکومەتا نوو یا فیدڕال ب سەرۆکاتیا عەلی ئەلزەیدی، سهرۆكێ حكومهتێ کر ژ پێخەمەت گەشەپێدانا ئابۆری و خزمەتکرنا هەموو وهلاتی و پێکهاتەیێن عێراقێ ب یەکسانی و بێ جوداهی، دگەل چارەسەرکرنا کێشەیان دگەل هەرێما کوردستانێ ل سەر بنەمایێ دەستووری.
ل داوییێ ژی، هەردو ئالى ب ههڤڕابوون ل سەر گرنگیيا کاراکرنا پەرلەمانێ کوردستانێ و پێکئینانا کابینەیا نوو یا حکومەتا هەرێمێ دا کو د نێزیکترین دەم دا چەقبەستویيا سیاسی ب داوی بێت.