سهما:
پشتى 12 سالان هێش حكومهتا عێراقێ دانپێدان ب جينۆسايدا ئێزدييان نهكرييه، رێڤهبهرێ سازييا ئێزدييان يا نێڤدهولهتى بۆ بهرههنگاربوونا جينۆسايدێ ڕاگههاند، دادپهروهرييهكا دورست و چارهسهرييێن بنهرهتى بۆ دۆزا ئێزدييان ل سهر ئاستێ نێڤدهولهتى ب دهستڤهنههاتينه.
سهما: پشتى 12 سالان كهيسا جينۆسايدا ئێزدييان گههشتييه كێدهرێ؟
حهسۆ هورمى: دۆزا ئێزدیيان ل سەر ئاستێ نێڤدهولهتى و ئهو دانپێدانێن بڤێ تاوانێ هاتينه كرن، دكارين بێژين نە دادپهروهرييهكا دروست و نە چارەسەریيێن بنەڕەتی ژی بۆ ڤێ تاوانێ و كاريگهرييێن وێ ل سەر خەلکێ و قوربانييان ب دەستڤه هاتييه، پشتی 12 سالان دۆزا ئێزدیيان ژ دۆزەکا لۆکالی چۆ دۆزەکا نێڤدهولهتى ل سەر ئاستێ جیهانێ، واتە دانپێدان د بوارێ قانوونی دا، مافێ مرۆڤان دا، نەهێلانا دووبارەکرنا جينۆسایدێ؛ بهلێ ئەڤ دانپێدان ب ڕاستی نەهاتیيە وەرگێڕان کو دادپهروهرى هەبت و ئازارێن ئێزدیيان چارهسهر بكهن.
سهما: حكومهتا عێراقێ چ بۆ كهيسا ئێزدييان كرييه؟
حهسۆ هورمى: رۆلێ حکومەتا عێراقێ نه ل ئاستێ پێدڤى دا بوو بۆ چەسپاندنا دادپەروەریيێ و مافێ قوربانیيان، هەتا نهۆ من نەبهیستیيە کو ل عێراقێ دادگەهەک ل سەر جينۆسایدا ئێزدييان هاتبته پێکئينان. ڕاستە هندەک تاوانبارێن داعش هاتنه دادگههكرن لێ ب یاسایا دژە تێرۆرێ تێنه دادگههكرن، نە ب توهمەتا جينۆسایدێ، ئەڤێ چهندێ ب شێوەيهکى خراب دبينين.
سهما: بۆچى ئاوارهيێن شنگالێ ناڤهگهڕن؟
حهسۆ هورمى: هێش ب ههزاران ئێزدی ئاوارەنە د ناڤ کەمپان دا، مخابن مهرجێن زڤڕاندنا وان بۆ شنگالێ نەهاتینە دابینکرن؛ ژ بهر ڤان هۆكاران پرسێن ئەمنی، گرۆپێن چەکدار ل وێدهرێ نە، نه ئاڤەدانکرن، خزمەتگۆزاریيێن بنەڕەتی و کار نینە.
سهما: دۆزا ئێزدييان گههشتييه دادگهها تاوانێن نێڤدهولهتى؟
حهسۆ هورمى: هەرچەندە تيما( UNITAD)يا نهتهوهيێن ئێكگرتى، گەلەک بهلگه کۆمکرن، لێ مخابن باش نەهاتینە بکارئینان و دادگههێن هاتینە کرن هەتا نهۆ د سنووردار و کێمن. بترژى دادگههێن ئەورۆپی بوون و ئەڤ دۆزە نەچۆيه بەر دادگهها تاوانێن نێڤدهولهتى يان دادگهههكا تايبهتمهند کو ڤى کاری بكهت. ههڤدهم هێش چارهنڤيسێ قوربانييێن ئێزدى نهى دياره و ئهو ل هيڤييا بدهستڤهئينانا دادپهروهرييێ نه.
سهما: چهند وهلاتان دانپێدان ب جينۆسايدا ئێزدييان كرييه؟
حهسۆ هورمى: ههتا 21 وهلات و سازييان و دناڤدا ههرێما كوردستانێ دانپێدان ب جينۆسايدا ئێزدييان كرييه، ئەڤە ژی بوعدەکێ مەزنە دایێ کو ديكيۆمێنتهكا باش بێتە کرن. ژ وان جينۆسایدێن هەرە بتر هاتیيە ديكيۆمێنتكرن د چهرخێ 21ێ دا ئەڤا ئێزدیيان بوو.
سهما: گهرهنتى ههنه جينۆسايدا ئێزدييان دوباره نهبت؟
حهسۆ هورمى: چ ئالیەت نەهاتینە دانان كو ل عێراقێ جارەکا دی تاوان دوبارە نەبت، چی ب سەرێ ئێزدیيان يان ههر ئێكێ دى بت و ئەڤە تشتەکێ قائمە، نە دورە ژی جارەکا دی جينۆساید چێ ببت.
سهما: چ بۆ كهيسا ئێزدييان بێته كرن؟
حهسۆ هورمى: دڤێت حكومهتا عێراقێ تشتهكى باش وەکی یاسایا ڕزگاربوویان بكهت و کار زووتر بێتە کرن د گۆڕێن بكۆم دا، شنگال بێتە ئاڤهدانکرن و خەلک ب زڤڕنە سەر جهـ و وارێن خۆ ڤه.