ناڤەندا نووچەیان – سەما
لژنەیا دارایی ل پەرلەمانێ عیراقێ پێشنیازا دامەزراندنا سندۆقا جهگیركرنا مووچەی پێشكێشكریە، پەسەندكرنا ڤێ پێشنیازێ و دەنگدان ل سەر، پێدڤی ب ڕازیبوونا حكومەتێ هەیە.
عودەی عەواس، سەرۆكێ لژنەیا دارایی ل پەرلەمانێ عیراقێ ئاشكراكر، ئەڤ پرۆژەیێ وان هەموو مەرجێن قانوونی و دەستووری تێدانە، لێ ژبەركو لایەنێ دارایی دناڤدایە، پێدڤی ب ڕازیبوونا حكومەتێ یە بەری بكەڤیتە بەر دەنگدانێ.
ل دووڤ پێشنیازێ، ئەڤ سندۆقە دێ وەكو دەستەیەكا سەربەخۆ هێتە دامەزراندن و ئێكسەر ب جڤاتا وەزیرانڤە هێتە گرێدان، ئارمانج ژێ دابینكرنا پارەییە داكو گەرەنتییا پێدانا مووچەیێ فەرمانبەران بهێتەكرن خو ئەگەر بهایێ پەترۆلێ بهێتە خوار ژی.
وەزارەتا دارایی دێ سەرپەرشتیا سندۆقێ كەت، نوونەرێن بانكا ناڤەندی وەزارەتا پلان دانانێ، دەستەیا دەستپاكییا فیدرالی و شارەزایەكێ ئابوورییێ سەربەخۆ دێ تێدا ئەندامبن.