ناڤهندا نووچهیان – سهما
لقێ 17 يێ ل شنگالێ د بيرهوهرييا سالڤهگهڕا جينۆسايدا ئێزدييان پهيامهك بهلاڤ كر و ئاماژه ب وێ چهندێ دا، پێدڤییە ل سەر حکومەتا عێراقێ هەولێن بتر بۆ نەهێلانا شوونوارێن جینۆسایدا ئێزدیيان ب ڕێیا بجهئينانا ڕێککەڤتنا هەولێر و بەغدا دا، ئاڤەدانکرنا دەڤەرا شنگالێ و قەرەبووکرنا خەلکێ وێ بكهت.
دهقێ پهيامێ:
ئەڤڕۆ، ل ٣ی تەباخێ، بیرهاتنا دوازدە ساڵیا ئێک ژ دڕندەترین و دلتەزینترین ڕوودانێن سەدێ بیست و ئێکێ دکەینەڤە؛ جینۆسایدا ئێزدیان ل شنگالێ و دەوروبەرێن وێ، کو ل سەر دەستێ ڕێکخراوا تەمەن کورت و هۆڤا داعش هاتە ئەنجامدان.
ئەو ڕۆژە، وەک ڕۆژەکا ڕەش د دیرۆکا مرۆڤایەتیێ دا هاتە تۆمارکرن، ڕۆژەک کو تێدا ب هزاران مرۆڤێن بێگونەھ هاتنە کوشتن و ب ساخی بنئاخکرن، و ب هزاران دایک، خوشک و زارۆکێن مە هاتنە ڕەڤاندن و ئێشاندن. جینۆسایدا ئێزدیان برینەکا کوور بوو تنێ ژبەر ناسنامەیا وان یا ئایینی و نەتەوەیی.
ئەڤ ڕووداوە نە تنێ هێرشەک بوو بۆ سەر دەڤەرەکا دیارکری، بەلکو هێرشەک بوو بۆ سەر بنەما و بەهایێن مرۆڤایەتیێ و پێکڤەژیانێ ل دەڤەرێ.
د ڤێ بیرهاتنا خەمگین دا، ئەم جەختێ ل سەر ڤان خالان دکەینەڤە:
ب ڕێز و حورمەتەکا مەزن ڤە، سەرێ ڕێزێ بۆ گیانێ پاقژێ جانگۆڕیێن ئێزدیان و تەڤایا شەهیدین شنگالێ دچەمینین و هەڤسۆزیا خۆ یا کوور بۆ مالبات و کەسوکارێن قوربانیێن جینۆسایدا ئێزدیان دوپات دکەین.
سڵاڤان بۆ وێڕەکیا دایک و کچێن کەتینە د بن دەستێ توندڕەوان دا و ب خۆڕاگریا خۆ نە هێلان ئیرادەیا مرۆڤێ ئێزدی بهێتە شکاندن.
داخوازێ ژ جڤاکێ نێودەوڵەتی دکەین کارێن جددیتر بکەن بۆ ناساندنا ئەڤێ کارەساتا مەزن یا ئێزدیان وەک جینۆساید ل سەر ئاستێ جیهانی، و دۆزینەڤا چارەنووسێ بەرزەبوویان و ڕزگارکرنا وان یێن کو هێشتا بێسەروشوینن.
پێدڤییە ل سەر حکومەتا عێراقێ و لایەنێن پەیوەندیدار کو هەولێن خۆ خێراتر بکەن بۆ نەهێشتنا شوێنەوارێن جینۆسایدا ئێزدیان ب ڕێیا جێبەجێکرنا ڕێککەفتنا د ناڤبەرا هەولێر و بەغدا دا، ئاڤەدانکرنا دەڤەرا شنگالێ و قەرەبووکرنا خەلکێ وێ و گۆرێن ب کۆم یێن مایین بهێنە هەلدان، دابینکرنا تەناهیێ و دابینکرنا ژیانەکا ژ هەژی بۆ ئاوارەیان دا کو بشێن بزڤڕنە سەر مال و حالێن خۆ.
خوشک و برایێن مە یێن ئێزدی، شنگال و جینۆساید د دلێ هەر مرۆڤەکێ خودان ویژدان دا زیندوویە.
ئێزدیاتی هێمایێ مان و بەردەوامیێ یە، و چ هێزێن تاری نکارن ڤێ ڕەسەنایەتیێ ژ ناڤ ببەن.
نەفرەت ل تاوانبار و تیرۆرستان، سەربلندی و نەمری بۆ جانگۆریێن ئێزدیان و شەهیدێن شنگالێ و هەموو شەهیدێن ڕێیا ئازادیێ.