ناڤهندا نووچهیان – سهما
ئيرۆ دوشەمبێ، 3ـی تهباخا 2026، مهکتەبا ڕێکخستنا PDK ل دهۆكێ، ب ههلكهفتا دهربازبوونا 12 سالان ب سەر تاوانا جینۆسایدا ئێزدییان ژ ئالييێ گرۆپێ تیرۆرستى يێ داعشێ ڤه، پهيامهك بهلاڤکر و تێدا تهكهزى ل سەر بجهئينانا تەماما ڕێکەڤتنا شنگالێ و قهرهبووكرنا قوربانييان كر.
مهکتەبا ڕێکخستنا PDK ل دهۆكێ:
ب ناڤێ خودێ یێ بەخشندە و میهرەبان
دەربازبوونا 12 ساڵان ب سەر کارەساتا شنگالێ دا، بیرئینانا برینەکا کوورا ساڕێژنەبووی یا وژدانا گەلێ مە و تەڤایا مرۆڤایەتیێ یە.
ل3ی تەباخا 2014ێ، دوور ل هەموو بنەمایێن ئۆلی، مرۆڤایەتی و یاسایی، تاقمێن تاریپەرێسێن تیرۆریستی یێن داعش تاوانەکا هۆڤانە بەرامبەر پشکەکا ڕەسەن و عەزیز ژ جەستەیێ گەلێ مە ئەنجامدا.
د ڤێ کارەساتێ دا، ب هەزاران وەڵاتیێن بێتاوان هاتنە شەهیدکرن، ب هەزاران کچ و ژن هاتنە ڕەفاندن، و ب سەدان هەزار کەس ژ سەر ئاخ و وارێ باب و باپیرێن خۆ ئاوارەبوون. ئەڤ تاوانە نە بتەنێ هێرشەک بوو بۆ سەر بەشەکێ ڕەسەنێ نەتەوا مە، بەڵکو هەوڵەکا شوم بوو بۆ تێکدانا شیرازێ جڤاکی، تەبایی و پێکڤەژیانا ئاشتیانە ل کوردستانێ.
ئەم وەک مەکتەبا ڕێکخستنا پارتی دیموکراتی کوردستان ل بەهدینان، د ڤێ یادا پڕ د ئێش و ئازار دا، ڤێ تاوانێ ب توندترین شێوە شەرمەزار دکەین. د هەمان دەم دا، تەکەزیێ ل سەر گرنگیا سزادانا تاوانباران دکەین. هەروەسا داخوازێ ژ حکومەتا فیدرال دکەین کو ب بەرپرسیاریا خۆ یا یاسایی و ئەخلاقی ڕاببیت، نەمازە د بیاڤێ قەرەبووکرنا دادپەروەرانە یا بنەماڵەیێن قوربانیان و تەڤایا زیانپێکەوتووان دا.
د یادا ڤێ کارەساتا مەزن دا، ب شانازیڤە، سەری ل بەر ئازایەتی و قوربانیدانا هێزێن پێشمەرگەیێن کوردستانێ دچەمینین، کو ل ژێر فەرماندەییا ڕاستەوخۆیا جەنابی سەرۆک بارزانی، زێدەتر ژ ٥٠٠ پێشمەرگەیێن قەهرەمان د شەڕێ ئازادکرنا شنگالێ و دەڤەرێن دی یێن ئێزدیان دا گیانێ خۆ قوربانی خاک و کەرامەتا گەلێ خۆ کرین و ژ ئەنجامێ وێ قوربانی، سەرۆک بارزانی ل 2015⁄11⁄13، مزگینیا ئازادکرنا شنگالێ ل سەرێ چیایێ شنگالێ ڕاگەھاندی.
ھەروەسا ڕێز و پێزانین ڤە ڕۆلێ خەلکێ دەڤەرا بەهدینان د ڤەکرنا هەمبێز، دەرگەهێن مال و مزگەفتێن خۆ بۆ خۆشک و برایێن خۆ یێن ئێزدی بلند دنرخینین. ئەڤ هەڵویستێ وان یێ پیرۆز سەلماندنا وێ ڕاستیێ یە کو گەلێ کورد ب هەمی پێکهاتەیێن خۆ یێن ئایینی و ئاینزایی ڤە ئێک نەتەوەیە و خودان ئێک چارەنڤیسە.
ل ڤێرە دوپاتیێ ل گۆتنا جەنابی سەرۆک بارزانی دکەین دەما فەرمووی:
«یان چ نەتەوە ب ناڤێ کورد نینن، یان ڕەسەنترین کورد ئێزدینە.»
هەر ب ڤێ هەلکەفتنێ، ستایشا هەوڵێن بەردەوام یێن سەرۆکاتیا هەرێمێ و سەرۆکاتیا حکومەتا هەرێما کوردستانێ دکەین د ڕزگارکرنا ب هەزاران کچ و ژنێن ئێزدی و دابینکرنا چارەسەری و خزمەتگوزاریێن پێویست بۆ ڕزگاربوویان. ل دوماهیێ، تەکەزیێ ل سەر جێبەجێکرنا تەماما ڕێکەفتنا شنگالێ دکەین، کو ل ژێر چاڤدێریا نەتەوەیێن ئێکگرتی ھاتیە ئیمزاکرن،کھ تاکە ڕێچارە بۆ ڤەگەڕاندنا ئاسایشێ، دامەزراوەیێن یاسایی، و ڤەگەڕیانا سەربەرزانە یا ئاوارەیان بۆ سەر مال و ملکێن خۆ.
کوردستان دێ ھەر مینیت لاندکا پێکڤەژیانا ئاشتیانە بۆ ھەمی پێکھاتەیێن خۆ یێن ئاینی نەتەوەیی و جڤاکی.
سڵاڤ ل بەرخودان وخۆڕاگریا خەلکێ شنگالێ
سلاڤ ل پاکێ شەهیدێن شنگالێ و تەڤایا شەهیدێن کوردستانێ، و سەروەرێ شەهیدان بارزانیێ نەمر و کاک ئیدریسێ جانەمەرگ.
ئازادی بۆ تەڤایا کچ و ژنێن ئێزدی، و سەرفرازی بۆ شنگال، ئێزدیخان و تەڤایا کوردستانێ.
کوردستان هەردەم ئارام و ئاڤەدان بیت.
مەکتەبا ڕێکخستنا پارتی دیموکراتی کوردستان ل بەهدینان
3ی تەباخا 2026ێ