ناڤەندا نووچەیان – سەما
رێڤەبەرییا کاروبارێن ئێزدییان ل پارێزگەها دهۆکێ ڕادگەهینت، کەسەکێ توندڕەو بێڕێزییەکا مەزن بەرانبەر ئۆل و دیڕۆکا ئێزدییان کرییە، هیڤیدارین ئەڤ کەسێن وەسا بگەهنە سزایێ خۆ یێ عادیلانە.
جەعفەر سمۆ، رێڤەبەرێ کاروبارێن ئێزدییان ل پارێزگەها دهۆکێ، ئیرۆ سێشەمبێ، 11ی تەباخا 2026، بۆ سەما ڕاگەهاند، ئەو ڤیدیۆیا هاتییە بەلاڤکرن د مالپەرێن سۆشیال میدیایێ دا ژ ئالییێ توندڕەوەکی ڤە ل ئیرانێ، ئەم ب توندی شەرمەزار دکەین و پەیاما مە هەمان پەیاما یا کو وەزارەتا ئەوقاف و کاروبارێن ئایینی ل حکومەتا هەرێما کوردستانێ دەرخستی.
دیار ژی کر، ئەڤ کەسێن هۆسا ژ بلی بەلبەلێ تشتەکی دی نکارن بکەن و ئەو کەسێن بێڕێزییێ ب ئۆلا ئێزدییان دکەن هیڤیدارین بگەهنە سزایێ خۆ یێ عادیلانە.
رێڤەبەرێ کاروبارێن ئێزدییان دوپاتکر، ئەو پێکڤەژیان و هەڤدوقەبوولکرنا ل هەرێما کوردستانێ هەی، هیڤییا مە ئەوە ب ڕێیا ڤان توندڕەوان نەئێتە تێکدان، چنکو ب ڕاستی ژی ئێزدی د ڤێ قۆناغێ دا بتر پێدڤی ب پشتەڤانییێ نە، چنکو ل سالا 2014ێ ئێزدی تووشی مەزنترین جینۆسایدا سەردەمێ خۆ بوون، برس، ترس و مالوێرانکرن ب سەرێ ڤی خەلکێ بێگونەھ دا هات، ب تایبەت ژی ئێزدییێن شنگالێ.
دا زانین ژی: خەلکێ مە هێش د ڕەوشا پەریشان یا کەمپاندا دژین و چارەنڤیسێ ب هەزاران ڕەڤاندییێن ئێزدی نەی دیارە، ئەم بتر پێدڤی ب پشتەڤانییێ نە و هاریکارییا مە بێتە کرن، نە ژی کو بێڕێزی بەرانبەر ئۆل و دیڕۆکا مە بێتە کرن.
ل هەرێما کوردستانێ پەیوەندییەکا بهێز د ناڤبەرا پێکهاتە و ئۆل و ئایینزانان دا هەیە و سەرجەم ئۆل بێی چو کێشە و ب ئازادی سەدان سالە بەرجەستەیا ئۆلا خۆ دکەن.